شجاعة القاسم بن الحسن عليهما السلام
«الصدر دارمي + حسيناوي»
جسم چسب شنيار...يطفي ويشب النار
يوم اليطب للملعب
* * *
هيف إو رهيف الطـول...والغانمه إبعنوانه
والمهر حدره إيجول...والنصر عند إعنانه
حيدر إبراسه إتگول...من يلعب إبميدانه
وعج الحرب لو ثار...بيده الفك يندار
يوم اليطب الملعب
* * *
ينسف إبعزمه إجبال...ويشيده إبمجهوده
سور وسعد وظلال...من هيبته إعله إحدوده
وبطارف العسال...للحرب ينگل زوده
وبشفرة البتـار...تتگاصف ألأعمار
يوم اليطب للملعب
* * *
إو لو يدگ جدمه إو گام...يومي وسفر عن باعه
إو دور النصر ينهال...من طلعته إللماعه
جاسم يحي هالفال...تگرب إبسيفه الساعه
تتراكم ألأخطار...تتطاير ألأبصار
يوم اليطب للملعب
* * *
من يدرع إبإيمان...گلبه ويشد عالغاره
ويصلي الـوغه إبنيران...عزمه إو جمر بتاره
تتراجف الفرسان...من هيبته القهاره
بالكون إله آثار...ويمثل الكرار
يوم اليطب للملعب
* * *
جاسم عذاب الهون...لو شد عله الخياله
ويتحدر الطاعون...من ساعده إو عساله
ويخلي گلب الكون...يتراجف من أهواله
وين اليحامي الجار...حافظ حكم وأسرار
يوم اليطب للملعب
* * *
من الحسن مذخور...جاسم النصرة عمه
ومأيد إو منصور...يا حي شبـاب الهمه
ما ظهر منه إگصور...لا لا ولا عز دمه
ما يصل كل ديّـار...يمه ويشوف إشصار
يوم اليطب للملعب
* * *
