« تجليبه»
ربيتك يجاسم وإتعبت برباك...شهيد إتروح مني روح ألله إوياك
إخذ صوغه لبوك الحسن من إدماك
خل يفـرح وإيحني إچفوفه...وإرباي إو مجهودي إيشوفه
* * *
للدين إنتصـارك يولدي إو عمك...صخيت إبروحك إو بيضت وجه أمك
إخذ دمعة إعيوني وإخذ من دمك
إو لچفوف الزهره إو حنيها...إو تنصبلك مأتم خليها
* * *
ربيتك يجاسم وإتعبت بربـاك...ردت عريس أشوفك وأگضي عمري إوياك
حاربني زماني إو خضبك بدماك
وإتهـدم بيتي إو صيواني...وأتحنه إبدمك خلاني
* * *
يجاسم والـدك يوم الوضعتك بيه...وصاني يرمله لولدي ربيه
لحسين إو فدائي الكربله ودّيه
والـروح الزينب يفديها...وإحگوگ إرباچ إيأديها
* * *
هـوت رمله إعله جاسم تصك بيديها...إعجنت حنة شبابك وين أوديها
إو زفافتك يبني إشلون أحنيها
ما تگعد سويلك چاره...وإبأمرك ظلت محتاره
* * *
صفت رمله إعله جاسم تجـذب الحسره...تشد طبره إو تخيط بالدمع طبره
يا عريس مثلك حوفته الغبره
وإبدم إصوابه إيحنونه...وإبليلة عرسه إيذحونه
* * *
يجاسم يا ضوه إعيوني إو يروح الـروح...عفت إمنصّتك وإعله الترب مطروح
عمت عيني إلتشوفك يولدي مذبوح
وإبدم إمصابك حنوني...إو من زفة عرسك حرموني
* * *
