سواد العين ويّه الدمع ينسال...إو گلبي من حريج الـروح ينسال
لون صارم ألأزدي علي ينسال...ولا صوب شبل سيد البريه
* * *
حنينك يا گلب إلمن تحنه...عله العريس إلبدمه تحنه
ما تدري بضلع رمله تحنـه...لأبنها وتجذب الونه خفيه
* * *
روحي ما بطل ونها وحنها...وجاسم نحل إضلوعي وحنها
شباب إو عفر إچفوفي وحنها...وتحنه إبدمعتي إو دم المنيه
* * *
يلوم إلما دره إبعلتي ولم بي...يجاسم هاك إخذ گلبي ولم بي
السيوف إتطشر إبدمك ولم بي...وأحني إچفوفك إبدم المنيه
* * *
جاسم حنة إچفوفـه من الدم...إو چبدتي إحترگت إبناره من الدم
الدنيه للوكت عبره من الدم...غير الصوّر أرواح البريه
* * *
إرچـاب الخيل من الزلم خلها...وإبرمحك إخشوم إعداك خلها
يجاسم حنتك بدماك خلها...إتصير إبحد شهيد الغاضريه
* * *
إمزجت روحي إثداي إرباك بالدار...إو ردت شمعة شبابك تشع بالدار
شمرني الفلك عن ألأمل بالدار...يجاسم وإنهدم بيتي عليه
* * *
يريم الصـار صدري إلك ما راح...لعد بالي الدهر بعداك ما راح
يجاسم بيك تعب إرباي ما راح...شلت راسي إبجهاد الغاضريه
* * *
روحي ما بطل ونها وحنها...عله إمصاب الطـوه إضلوعي وحنها
إچفوفي إشلون إخضبها وحنها...وإبني إتخضب إبدم المنيه
* * *
حمل گلبي ثجيل الصبر ولهام...وأسحن صبر من الصبر ولهام
عله جسم التوزع طبر والهام...حمل طبرته ألأزدي إو عز عليه
* * *