ألأبوذيات
الطفل الرضيع عليه السلام
يمن فگدك إلـراس الگلب عيّن...إو ثداياك الوشيل إللبن عيّن
يبني إو حرمله بالگوس عيّن...وريدك وإگطعه إبسهم المنيه
* * *
إبشوفك فرحتي ما تم سنلها...بعد لا نوم لعيوني سنلها
إو نبلة حرمله إبگلبي سنلها...تهيجني وأنه علتي خفيه
* * *
أفز نومي إو مسهره العين لبني...وأحسّب بالرضيع إو فاض لبني
يعبدألله إصرخت والنحر لبني...گطعني حرمله إبسهم المنيه
* * *
جواب ولدها الرضيع
يمي يالجره دمعچ ولي صاب...تصده حرمله الچتلي ولي صاب
بوريدي السهم نيشانه ولي صاب...ورضعتني إبثداياها المنيه
* * *
عن لسان حال الرباب (عليها السلام)
دار النوح لوليدي لبنها...وأحن ما حنّت الثكله لبنها
ثداي أُمك تره درت لبنها...يهالمظلوم بسهام المنيه
* * *
تشوط الروح من جسمي وردها...تلوج إو مهجتي ذابل وردها
سهم من حرمله بالطف وردها...گطع نحر الطفل وإصوابه بيّه
* * *
عليّه نايبة دهري مهدها...إدروب إسهامها الجسمي مهدها
المراضع درّت إو خالي مهدها...من أطفال إلگضت بالغاضريه
* * *
يدهري إرحم دليلي رضّعنه...إو ثدايه الموت طفلي رضعنه
آنه أسأل الباري الرضعنه...إبلطفه والصبر ينعم عليه
* * *
