مهر الحسين عليه السلام
«شيعتي»
من رد المهر يسحب إلجامه...وجهه إمخضب إبدم الإمامه
يصرخ طاح الحسين...والعالم تغير
* * *
چني إبمصرع حسين اوگلبي لمصابه تفطر
وعالأرض لله ساجد من ظهر مهره تكور
إولا عظم سالم إبجسمه اولا ضلع ظل ما تكسر
إو سهم المثلث موضعه...إبگلب الحسين إو گطعه
من خرز ظهره مطلعه...والمهر بأمره تحير
إبمحراب الشهاده حسين ساجد...ودمه إيفور بالأربع مساجد
ويحضب الكونين...والعالم تغير
* * *
چني ويـّه المهر حـاير والمهر حـاير إبأمره
ايشوط نوبه او يرد نوبه او يحني عالمصيوب ظهره
يشم خيـّاله ابوريده إويحط صدره فـوگ صدره
ايفييله من حر الشمس...خايف عليه امن الدهس
من شافه گاضي ما يحس...طاح واتمدد ابكتره
دم حسين ينزف من إجـروحه...او مهره يصهل اويجهد ابروحه
وين انطي الوجه وين...والعالم تغير
* * *
ومن هجم عسكر الكوفه المهر صد لحسين عينه
اوشاف خياله رميه او سيفه طايح من يمينه
او جال بالفرسان جوله إو چتل من عدهم العينه
هذا اليصكه ابحافره...اوذاك اليگلبه اعله الثره
دمر الجيش إو صدره...او رد على الجسمه رهينه
وشـاف حسين ما بيه بعد چاره...روحه اخلصت والدم ايتجاره
ينهض ماله تمكين...والعالم تغير
* * *
او شاهدت للمهر حاله انصبت منها او زاد روعي
من حنى اعله حسين ظهره كسر گلبي او حنه إضلوعي
ادموع جسمه او دمع مهره دم حمر صبغت ادموعي
ايلم العنـان ابشفـّته...ايجيبه او يسلمه ابراحته
او خضب ابدمه جبهته...مرد روحي او دهش نوعي
خله حسين عالتربان عـاري...امغسل بالدمه إمچفن ابذاري
او شـاط اعله الصواوين...والعالم تغير
* * *
هالله هالله اشحال مهر حسين من رد الحريمه
منذهل والسرج خالي يصهل إيصيح الظليمه
اطلعت گبل الحرم زينب لزمت إبإيد الشچيمه
وإبإيـد أومت عالحرم...وصـاحت الصيوان إنهدم
ساعه او يحرگون الخيم...يالعلي والله اشهضيمه
ويـن حسين خليته رميه...وآنه ابهالحريم اشلون بيه
جيتك فگست العين...والعالم تغير
* * *
انصابت اگلوب العيال ابنايبه الما أشد منها
من إجاها المهرخالي اوگطع من حسين ظنها
يبست ابدمها الأرامل والمراضع جف لبنها
شتصير زينب شتحمل...واتداري چم طفلة او طفل
وليانها راحوا چتل...وإلنوايب مرمرنها
ومن عين المهر دمـع المصيبه...يتفايض على مصاب الغربيه
وعالظلوا مطاعين...والعالم تغير
* * *
ويالمهر ترجف إعضامي من صريخ الفاطميه
اومثل زينب صوبتني اسهام رمي الغاضريه
واسمعت سكنه تنادي اتيتمت وانگطع بيه
للمهر لمن شافته...دم الحسين ابگصّته
صاحت ابعبره إونشدته...بالله لا تخفي عليّه
وإبوجه المهر صاحت إسكينه...دم حسين هذا حسين وينه
صاح إتضحّه للدين...والعالم تغير
* * *
