زينب تعاتب الحسين عليه السلام
«ميمر مذيل»
يحسين أخبرك...من طحت عالغبره
زينب مشت چتــالك إيباريها...من طحت عالغبره
* * *
يحسين أريد ألچم إجروحـك يحسين...من غصباً عليه
إبعيني و روِّي چبدك إبماي العين...وأبديلك شچيه
وأدري السهم جاسم دليلك نصين...يا روح الزچيه
فجرت عيني...من طحت عالغبره
والمـاذي چبدك چبدتي ماذيها...من طحت عالغبره
* * *
يحسين أدري بالمثلث ماذيك...سم جراحك سمّه
والعتب أمضه إمن السهم يمض بيك...لحد يبو اليمه
وأصعب من إصواب الحجر عتبي إعليك...ما ينحمل همه
جمـرة عتــابي...من طحت عالغبره
إبگلبي تره ويحترگ وإيطفيها...من طحت عالغبره
* * *
جمرات عتبي لو خفاهن گلبي...ينچبد يتمرمر
إو يحترج من دم الحماسه اليدبي...يذبل إو يتغير
يحسين إخذ حال الحرم من عتبي...وإنته بيهن أخبر
هيّجـت نــــاري من طحت عالغبره
إو عتبي يخبرك بالحــرم سابيها...من طحت عالغبره
* * *
يحسين إخذ عتبي إو يخبرك بالصار...إبحال الفاطميه
شوف الضرب شوف النهب شوف النار...برض الغاضريه
وإتصيح زينب يالتحامون الجار...يرجال الحميه
تنخه إو تنـــادي...من طحت عالغبره
هاشم إو لا ظل هاشمي إيحاميها...من طحت عالغبره
* * *
يحسين إخذ من عتبي حال إعيالك...وإتمثل أخباره
إو شفرة إعتابي تجرح إبدلالك...وإتمرد أثماره
والخيل تدري إشرضّت إمن اطفالك...من شنت الغاره
الرضت إضلوعك...من طحت عالغبره
مثلك غدت بالحافر إترض بيها...من طحت عالغبره
* * *
إو ليلة الحادي عشر تدري إشلون...وحشه ذيچ الليله
حالة أطفالك غيّرت حال الكون...وإتكاثر عويله
إو ما غفت لعيالك يبو اليمه إعيون...إبحد عزها ذليله
ظلت حرمكم...من طحت عالغبره
إبعز ألإبه إو ذلة فگد واليها...من طحت عالغبره
* * *
يحسين إخذ من عتبي توضيح إعلـــوم...وإدموعه علامه
والليل من غابت شمس ذاك اليوم...وإتراكم ظلامه
گامت عله السجاد العيال إتحوم...وإتلوع اليتامه
حنت إعيـــــالك...من طحت عالغبره
تشجي العليل إو من يشجيها...من طحت عالغبره
* * *
يحسين إخـــذ عتبي إو حريـج أُفّـــادي...عالفگدت وليها
إو عتبي يخبرك بالحريم إشسادي...وإشجاري عليها
وهسا تشوف إمخدرات الهادي...إشلون إمچتفيها
إو رگبـــــــة عليلك...من طحت عالغبره
يحسين وألله إبجـــامعه إمطوگيــها...من طحت عالغبره
* * *
يحسين إخذ عتبي إو يخبرك بالحـــال...من غرّب ضعنكم
كل محمل إيباريه إلكم چتال...وإيروع حرمكم
إشما تنضرب بسياط من الجمّال...تتچنه إبشيمكم
إو لــو طفلـــه عگبت...من طحت عالغبره
عالرمح راسك يثگل إيناديها...من طحت عالغبره
* * *
يحسين إخذ من عتبي وصف الكوفه...وإتشوف اليساره
بحبال خشنه إمگيّده إو مچتوفه...والعين إتجاره
إو سبي الفواطم يا حسين إتشوفه...طب گصر ألإماره
چتالك أضحه...من طحت عالغبره
بطراف سوطه الزينب إيحاچيها...من طحت عالغبره
* * *
