نور عيني يا حسين
«ميمر مذيل»
يعيونـي يعيوني...يحسين يعيوني
فارگني ويّاك الدهر...يحسين يعيوني
* * *
إي وحگ سهم الصابك إبدلالك...گطع دليلي
ظليت عبك حايره بعيالك...وإنهدم حيلي
ألله من دهشة صريخ أطفالك...ما نمت ليلي
حيروني حيروني...والگوم حيروني
وإبليلة الحـادي عشر...يحسين يعيوني
* * *
ليلة سبي إو ليلة خيم منهوبه...وإگطعت گلبي
وآنه إبمرامي النايبه مصيوبه...إو ما شوف دربي
وأرعه إبحرم مترمله إو مرعوبه...يشهدلي ربي
خلونـي خلوني...يبن أمي خلوني
أشگف إو عاميني الخطر...يحسين يعيوني
* * *
أصبحنه وإسهام الشماته إلتنهال...يچتل رميها
إو ما مثل عايلتك يبو اليمه إعيال...يفجع سبيها
إو عالنوگ رچبوها إو تنوح ألأطفال...وإمگيديها
ضيعوني ضيعوني...والنـاس ضيعوني
ولاچني بـت سيد البشر...يحسين يعيوني
* * *
سدَّر سبينه إو عالجثث مرينه...وإصوابي بيّه
إو رِدنه الوداع إو ما حصل بيدينه...إو عفتك رميه
إو كل نايبه إلمن الدهر ترمينه...إمن الغاضريه
صابوني صابوني...بسهام صابوني
من صوّبو راسك حجر...يحسين يعيوني
* * *
إو بالدرب راسك بالرمح يبرالي...وإتصدله عيني
ينخشع گلبي وإيتغير حالي...إو يثگل ونيني
يبن أمي وإصواب المرد دلالي...إو هيج حنيني
لوعوني لوعوني...بسيـاط لوعوني
هاك إخـذ من متني ألأثر...يحسين يعيوني
* * *
وإبمجلس إبن إزياد من طبينه...وإذكرت مسلم
إو صرخة يتيمة مسلم إتبچينه...إو تسبي العوالم
ألله وإبن إزياد من صد لينه...والثغر باسم
هانوني هانوني...وأصحـابه هانوني
حچي الزلم قل إو كثر...يحسين يعيوني
* * *
