مرعلى الشاطي يحادي ارچابنه...انريد للعباس نبدي اعتابنه

تصيح زينب والمدامع هامله...بالضعن سانف يحادي الكربله
انعاتب العباس راعـي المرجله...المن وطن جدنه كفلنه اوجابنه
* * *
آه من سانف الحادي يهالناس...والحرم معوله او تلطم إعل الراس
امن اليسر زينب تنادي يعباس...اليوم اجينه قوم وابني اطنابنه
* * *
آه لمن لفت شاطي العلگمي...زينب اتنادي مدامعها انهمي
بالخلد نايم يليث الهاشمي...واحنه رج سبع الشداد إمصابنه
* * *
وانحنت عالگبر مفجوعه الگلب...اتصيح ياعباس والمدمع يصب
گوم شوف امتونه ابكثر الضرب...سود والضارب زجر ما هابنه
* * *
يعباس انت ابضعنه اتوزمت...امن المدينه وبالعيال اتكفلت
ونزلتنه ابكربلا وعنه غبت...وصابنه من الدهر ماصابنه
* * *
سدة اسكندر ابحدنه مانعه...چنت لاچن من طحت عالمشرعه
طاحت وضاگت علينه الواسعه...عگبك وبينه طمع سلابنه
* * *
ريت عينك يعباس اتشوفنه...إنلوذ بكتار العده من خوفنه
ابديرة الكوفه وسترنه إچفوفنه...وآل أُميه إمسلبين إحجابنه
* * *
وبالحبـال امچتفينه اعله الهزل...وبالأسواق إيخم سبينه يانفل
والعده هذا اليودعنه ابچتل...وذاك ضاربنه وهذا السابنه
* * *
والأمَر بالمجلس ابن ازياد صاح...اهنا يزينب روس اخوتچ عالرماح
والجسوم اموزعه ابـّيض الصفاح...ابكربلا وصارت هدف نشابنه
* * *
ويامصيبه التنـّسى ابديرة الشام...ونة السجاد لو صرخ الايتام
لوسبينه الصار فرجة خاص عام...آ يضيعتنه او فگد غيابنه
* * *
ومن دخلنه المجلس الطـاغي يزيد...بالحبال امچتفينه إمن إيد ليد
والعليل برگبته طوگ الحديد...ونبچي لمصابه ويحن لمصابنه
* * *
والفطر چبدي يمگطوع اليمين...إگبال بن هنده رمو راس الحسين
ينكث ابثغر السبط گرة العين...ابخيزرانه ولچم جرح اصوابنه
* * *
يعباس ولا حصل مسلم وشـاف...حالنـا وينشد بنى حرب الأجلاف
اشذنب هاي العايله إمچتفه إچتاف...إمن الخوارج يعدون انسابنه
* * *
حـرم برض الشام خلانه الزمان...اظهورنا اتولمت بچعوب السنان
والمتون اتوسمت بالخيزران...والحبال امعگده برگابنه
* * *