بنو أسد ودفن الحسين عليه السلام
«ميمر مذيل»
يومك فجعنه...يا صريع الغبره
يحسين إجينه الجثتك دفانه...يا صريع الغبره
* * *
يحسين چني إبكربله وروحي إتحوم...ولها وتباريكم
صرعه لگتكم عالثره وبس إجسوم...وبالدمه إمغسليكم
وشلون دفّانتكم إبذاك اليوم...گدرت إتواريكم
إنشد دليلي...يا صريع الغبره
وسّا يسولف لك لسان أحـزانه...يا صريع الغبره
* * *
يحسين نار أحزانّه حرگتنه...مثل حرگ اطنابك
ومن جمرة إمصابك تشب جمرتنه...آ يجمر إمصابك
من سهم گلبك فجرت دمعتنه...مثل دم إصوابك
دمع التفايض...يا صريع الغبره
ما يطفي من گلب الحـزن نيرانه...يا صريع الغبره
* * *
طبينه للحومه إنتصارخ يحسين...وشفنه فوگ الغبره
بس الجثث والروس ما ندري وين...يا عزيز الزهره
ظلينه نتمثلكم إو متحيرين...بالدفن وإبأمره
حرنه إبدفنكم...يا صريع الغبره
وما نعرف الساده من العوّانه...يا صريع الغبره
* * *
وشفنه شبـاب البالعرس متهنه...وفجرت دمعتنه
عريس وبدم الوريد إمحنّه...وإسچبت عبرتنه
إعرفناه جاسم والعلامه الحنه...وأسعرت جمرتنه
عالما تهنه...يا صريع الغبره
وعريسكم ندري الدمه نيشانه...يا صريع الغبره
* * *
وشفنه شباب إبكتر جاسم مطروح...ويتفايض دمه
وريحة رسول ألله من أوداجـه إتفوح...يا سعد من شمه
إعرفناه ألأكبر والسعد بيه إيلوح...حي شباب الهمه
همتـه إيهمتك...يا صريع الغبره
والسعد منك لولدك عنوانه...يا صريع الغبره
* * *
يحسين بس إعيونه تتربه...وبالدمع هماله
إندوّر رضيع إللي تيبس گلبه...وإنمرد دلاله
شفنه الرضيع إمطوگينه بحربه...وحرمله چتاله
طفلك إشذنبه...يا صريع الغبره
ألله من غي حرمله وطغيانه...يا صريع الغبره
* * *
يحسين چم طفله وطفل عالتربان...نايمه شفناها
سحگتها بالحافر إخيول العدوان...ماتت من ضمـاها
يحسين متگلي إشذنب هالرضعان...روت من إدماها
وألله إشمصيبه...يا صريـع الغبره
ماتت غصر وإمروعه وعطشانه...يا صريع الغبره
* * *
