يمسافرين وياكم إخذوني إخذوني...من البجي لا يعمن اعيوني اعيوني
لو ما أروح بهاي رحلتكم...فوق المرض تقتلني فرقتكم
ما بيكم تأجلون سفرتكم...أجلوها عاد الخاطر اعيوني
آنا العليلة وبيكم أتنخه...لو رحتو حيلي من السهر يرخه
لصرخ بعدكم يا هلي صرخه...حدما أطيح وينخطف لوني
طفله وبعدني ازغيره عالفرقه...من هسه أحس بروحي مختنقه
لو رحتو يمكن ما بعد ملقه...كل خوفي يهل الخير تنسوني
أبقه بحسرتي ومدمعي الهامل...أشتاق لحسين و أبو فاضل
قلبي بسفركم ما هو متفائل...والموت تارس فكري واظنوني
جفني اليهل ما ينقطع نوحه...والفاجد اتمل الصبر روحه
الفارق هله متفارقه اجروحه...وانتو بمسيرتكم جرحتوني
تمشون عني وتكثر أحزاني...يبقه القلب يهل الوفه امتاني
الشوفة أخواتي وشوفة اخواني...بلكت قبلما أموت يلفوني
ليله اعله ليله امناطره الجيه...يمته الضعن يرجع يمر بيه
خايفه الموت ايسير اعليه...وأحباب قلبي الوحدي خلوني
