ردينه من اليسر ردينه
ما تگعد إتشوف إشصار...لا خيمه عدنه ولا دار
من اليسر ردينه
* * *
طرت بجناح النوايب والمصيبه إتحوم بيّه
وأصبحت يوم اربعين حسين بأرض الغاضريه
إسمعت ونة گلب لاهب من حنين الفاطميه
وإنشدت من هـاي التون...نادوني حوراء الحزن
زينب عله إخوتها تحن...إتصيح يرجال الحميه
إتعنينه المصرعكم إتعنينه
وإحنه إبحماكم خطار...لا خيمه عدنه إو لا دار
من اليسر ردينه
* * *
إتگوم من يم گبر تگعد يم گبر زينب الحره
لمن وصلت گبر أخوها حسين طاحت عله الغبره
إتصيح يا شمعة إعيوني حسين يا مهجة الزهره
يحسين منهو الغسلك...إو منهو البگبرك نزّلك
يحسين من طرني الفلك...ما خفاك اليسر أمره
تبيينه واليوم إخذ تبيينه
من گلب يتجـادح نار...لا خيمه عدنه إو لا دار
من اليسر ردينه
* * *
وإسمعت صرخة يتامه إو للشريعه إموجهيها
وإصرخت شنهو اليتامه إشصابها وإلمن بچيها
گالو إتريد الكفلها إمن الوطن وإلتزم بيها
وإتريد گبره إو مصرعه...وإتوجهت للمشرعه
چفين عدها إمگطعه...إو راحت إتدور عليها
الواليها وتعنت إلواليها
تصرخ يبن حامي الجـار...لا خيمه عدنه إو لا دار
من اليسر ردينه
* * *
إشلون ساعة خطر بيها المجلس الطاغي إدخلونه
الجامعه إبرگبة عليلك والسلاسل عله إمتونه
آمر يزيد إبسجنّه والعليلك يذبحونه
ميريد من هاشم طفل...سـالم يظل ما ينچتل
إو گادو السجاد إبحبل...يمشي والجلاد دونه
ضجينه إبصرخة فزع ضجينه
يا حافظ إو يا ستار...لا خيمه عدنه إو لا دار
من اليسر ردينه
* * *
إنصبت بالمجلس مصيبه إو ظل عليها الجفن دامي
راد يستخدم يتيمه من يتاماكم الشامي
إو گال هاي الحرم ملها لا كفيل إو لا محامي
صكيت وجهي إبراحتي...إو فجرت دمعة غربتي
يحسين صارت چبدتي...هدف لسهام المرامي
چا وينه ذاك الخدر چا وينه
راح الخـدر والعمّار...لا خيمه عدنه إو لا دار
من اليسر ردينه
* * *
والحمس چبدي إو مردني صوت إبن هند إبقباحه
ينكث إبثغرك إو ثغرك للنبي وردة صباحه
إشما يشيل الخيزرانه إتصير لعيالك مناحه
يا ريت عگبك لا عشت...إو لا شفت راسـك بالطشت
إو چم نايبه إلبيها إنصبت...إو ما شفت يحسين راحه
يرمينه كلسا سهم يرمينه
أحّا يدهر الغدار...لا خيمه عدنه إو لا دار
من اليسر ردينه
* * *
آنه زينب والنوايب تمل گلبي إو ما يملها
وإبذلت باليسر جهدي إو ردت أرد بالحرم كلها
إو من يتامالكم يتيمه باليسر وافت أجلها
عالطشت ملهوفه هوت...ظنينه متعوبه إو غفت
ما ندري للموت أسلمت...وإنگطع منك أملها
مسّينه إبريبه إو خطر مسّينه
لا حـارس إو نغّار...لا خيمه عدنه إو لا دار
من اليسر ردينه
* * *