أيهما أعظم ؟ (مصيبة رأس الحسين أم جسده)
«هجري»
حين راس حسين ويه الجسم أمسه ابحفرته
انعطف واحد على الثاني وگام يشچي حالته
* * *
عن لسان الحال أبيِّن خبر عن راس الحسين
من تلاگه اويا الجسم بالگبر يوم الاربعين
حين شاف الجسم راسه انعطف وأبداله الحنين
واظهر الصوت من النحر...يا راس بن سيد البشر
عگبك علي تدري اشصدر
لعبت الخيل اعله صدري وبالحوافر رضته
* * *
وبالشمر تخبر بيوم اللي على صدري اعتله
وافرزك عني يراس حسين بن عقد الوله
وارفعك عالرمح وآنه بگيت مرمي بالفله
دمي من جروحي يكت...ومن دم وريدي اتغلست
بذاري الوطيه اتچفنت
الراس ناده النوب اخبرك حالي وأجرت دمعته
* * *
اهنا يجسمي انچان ذاري الريح سوالك چفن
راسك ابديرة الكوفه ابطن تنور انسجن
ابهاي تشهد لي الحواري النزلت إويا أُم الحسن
بهودج النور إمن السمه...يا جسم و أُمي فاطمه
منها المدامع ساجمه
ومأتم بدار ( الخولّه ) على مصابي نصبته
* * *
الجسم ناده إهنا يراسي من الضمه چبدي إنفطر
وسهم المثلث ابگلبي مضه او مطلاعه الظهر
وما بگه مفصل صحيح اوعظم سالم ما إنكسر
وتعلم الجمّـال اشصنع...بالخــاتم إغتر وطمع
وبخنجره الچفي گطع
حتى ثوب اللي عليه آل أُميه سلبته
* * *
اموذر ابحد المواضي امهشم ابحافر الخيل
ومن بني( سد) لعد دفني اگصدت وتعين العليل
بين اديها تشيل مني كتر والثاني يميل
لمن بنى سد شاهدت...حالي على مصابي جرت
ومن علي السجاد انشدت
هالشهيد اشچان ذنبه وطاحنيها الجثته
* * *
الراس ناده إهنا يجسمي إيهون البحالك سدر
لاچن اللي جره ابحالي يفسر الصم الصخر
آنه باريت العيال الدرب كله ابها لسفر
وآنه المشيت اويا لظعن...وإجرعت چاسات المحن
وانظر خواتي اتلوعن
بالعصه وشفت العليل الطوگ ولَّم رگبته
* * *
يا جسم واللي هظمني وخله دمعي يكت حمر
من شفت متن إختي من السوط صاير بي أثر
وكل عصى اللوعت زينب لچمت اصواب الحجر
وعيني على اطفالي ترب...ودمعـي عليها منسچب
آنه أنضرب من تنضرب
والطفل من يضربونه يستجير إبعمته
* * *
وشفت بالكوفه مصايب لاچن الأعظم الشام
مدري الفرجة الوادم أصد لو أرعه الايتام
شفت بالمجلس حريمي واجفه بين اللئام
وزينب الحرة امچتفه...امهبطه الراس او واجفه
إبحيرت بنات المصطفى
وگام بن هند ايتخطه ايعرف زينب رادته
* * *
ولعد حال الحرم دمعي سال وآنه اعله السنان
وبالطشت لمن هدوني لعد عباد الأوثان
وحطني اگباله وبيده لزم عود الخيزران
وبشفتي لساع الوسم...البالخيزرانـه منرسـم
جاوبني بالله يا جسم
إمصابك أعظم لو إمصابي ؟ وياهو أعظم غصته
* * *
الجسم ناده ابهالمصيبه كل مصيبه هونت
لاچن اخبرني اعيالك كلها وياك ارجعت ؟
لو بعد منها يبو السجاد بالشام اعگبت
نـاداه يتيمه اتعـگبت...موعدله لاچنها گضت
ماتت غصر من شاهدت
ثغري من الوسط أزرگ هوت فوگه او شمته
* * *
