نكبة السبي
«ميمر مذيل»
سابينه سابينه...والدهـر سابينه
والحادي شد الراحله...والدهر سابينه
* * *
يبن أمي من الدهر وافانه إصواب...بالغاضريه
حرمه إوغريبه إو حايره بين أجناب...وإنگطع بيه
إو جمر العطش بالگلب يدوي إو لهّاب...وأثّر عليه
وإسكينه وإسكينه...من صاحت إسكينه
أحّـا يجمرة كربله...والدهر سابينه
* * *
وإشلون ظهرية خطر وافتنه...إبطيحـة علمنه
إو من هجمت الخيل إو زلم دهستنه...إو فتّر عزمنه
إو حرگو علينه إخيامنه إو حرگتنه...حرگة خيمنه
فرينه فرينه...إمن النـار فرينه
يبن أمي بفجوج الفله...والدهر سابينه
* * *
وإبلمّة إعيالك الصارت طشار...گلبي تمرمر
إو رديت لمخيمك لن بس النار...يبن أمـي تسعر
إو صاحت فرد صيحه الحرم يا ستار...أللهُ أكبر
چا وينه چا وينه...والخـدر چا وينه
وين النزل صـارو هله...والدهر سابينه
* * *
ظهرية العاشر إو كردوس الخيل...سدرهـا صبري
ظليت أفكر وأحسب إحساب ألليل...شيدبر أمري
والحرم ما تهجع إو تصرخ بالويل...شوّشت فكري
مسّينه مسّينه...وإشلون مسّينه
بين التحن والمعوله...والدهر سابينه
* * *
وإتناصف الليل إو فگدت ألأطفال...طفله إفگدتها
إوما هبت ليل إو خطر ذيچ ألأهوال...وإتطلبتها
حتى إوصلت مصرعك وإبذاك الحال...يمك شفتها
ردينه ردينه...للحـرم ردينه
شفت العيـال إموجّله...والدهر سابينه
* * *
ساهرت ذاك الليل ما شفت النوم...إو ما شفت راحـه
وأصبحنه يوم إهدعش بوجود الگوم...مچدر صباحه
إو طحنه إبظليمه وإشيفيد المظلوم...كثر النياحه
حادينه حادينه...والشمر حادينه
إو عالرمـح راسك شايله...والدهر سابينه
* * *
سار السبي إو عالجثث يا راعي الباس...من مرروني
ردت الوداع إوياك وأشرار الناس...ما أمهلوني
صوت الوداع إو خيزران الحراس...ورّم إمتوني
مرينه مرينه...إو عالجثث مرينه
بس المدامع هامله...والدهر سابينه
* * *
والخيّط إضلوعي إو مرد لب إحشـاي...سهم المنيه
للكوفه والشامات عنك ممشاي...غصباً عليّه
إبچي إلعليلك والعليل إعله إبچاي...ونته خفيه
والينه والينه...مالـوم والينه
وإمگيدينه إبسلسله...والدهر سابينه
* * *
