طفله ويسيره عدوان واميتمه
* * *
ضعن الفواطم من وصل لـرض الشام...بدار الخرابه نزلوهن يسلام
طفله ويتيمه نامت من الأيتام...شافت ابوها الغسلوه ابفيض الدمه
* * *
فزت الطفله واتهمل دمع العين...وتنادي يا عمه يزينب هالحين
عدنه يعمه چان والينه حسين...والدار تزهر والساع شو مظلمه
* * *
حنت الطفله والأرامـل حنت...والشام من ويد النحيب إرتجت
ويزيد ناده هاليساره إشّافت...تبچي وتنوح الهالساع مو نايمه
* * *
شوفو اليتامى اشصابها وشدهاها...ومنهو الـذي ماذيها وشأذاها
نادوه طفله ما تبطل إبچاها...شافت ابوها وإعليه متألمه
* * *
بالطشت ناده راس ابوها مطروح...اخذوه الها بلچن تبطل النوح
ويبطل بچاها لو درت بي مذبـوح...وگلولها إضلوع حسين متهشمه
* * *
بالطشت جابو راس أبوها الغلمان...ونادوها لتهلين دمعچ غدران
مذبوح أبوچ وهذا راسه نيشان...وازرگ أثر سوط ايزيد إبمبسمه
***
والطفله مدت للعبيد ايديها...وبعينها الدمعه نشف جاريها
ومنهم خذت راس السبط واليها...شالت البردش والنور شع للسمه
* * *
وصـارت على الطفله اليتامه لمه...ولو طفل يگرب على الراس ايشمه
اتصيح اليتيمه لا لتگرب يمه...اصواب الحجر خوفي عليه لا تلچمه
* * *
ما بين متخاطب وليها طاحت...مغشي عليها والفواظم ظنت
متعوبه من سهـر الليالي ونامت...ما درو بيها للروح امسلمه
* * *
جسوها لنها ميته ابهالنومه...للغسل لمن مدّو المظلومه
المغسله صاحت هاي أظن مسمومه...گلولها بضرب السـوط متوسمه
* * *