إباء الطفله
«ميمر مذيل»
تصـرخ الطفله...خادمه يردوني
وآنه الذي أملاك السمه ايخدموني...خادمه يردوني
* * *
لحسين طفله اتيتمت من بعداه...واخذوها غنيمه
والشامي من صد اليزيد او ناداه...اتسخدمني اليتيمه
والطفله لاذت بالعليل او تنخاه...واتصيح الظليمه
لا يـا چفيلي...خادمه يردوني
الذبحوا حسين ابكربلا او يتموني...خادمه يردوني
* * *
للشامي صد ايزيد صاح ابشده...لا تمس حرمتها
والدها الحسين او محمد جدها...او فاطمه جدتها
لاچن الطفله ريبت من عنده...او حنت الغربتها
يالكفلتيني...خادمه يردوني
شلهم علي هالـگوم شيطلبوني...خادمه يردوني
* * *
والشامي صد ليزيد ناداه انچان...انت بيهم عالم
ليش اذبحت والدها بالطف عطشان...واسبيت الفواطم
والطفله ترجف من رهيب الديوان...او تنخه ابدمع ساجم
لحـد يهاشم...خادمه يردوني
وين الهواشم خلهم ايحاموني...خادمه يردوني
* * *
صاحت على الشامي العقيله زينب...اشحسَّبت ابضميرك
إخسأ يواهم وإجلس إو إتأدب...لتشت ابمصيرك
ميصير هذا الأمر لا تتأهب...لنته اولا أميرك
والطفله تصرخ...خادمه يردوني
عن هالوجـوه المعبسه غيبوني...خادمه يردوني
* * *
او من لاذت الطفله ابكتر عمتها...من الدهـر واهواله
او حال العليل اتغير الحالتها...وانتحب لعياله
ولچمت اجروح السلسله ابصرختها...و أفجعت دلاله
تصيـح اليتيمه...خادمه يردوني
بت من أنا او بت خارجي اينسبوني...خادمه يردوني
* * *
ابصدر اليتيمه اتكسرت عبرتها...اوعلتها خفيه
واتفسر الصم الصخر حسرتها...او ونتها الشجيه
صاحت يعمه او فجرت دمعتها...ماني خارجيه
واللـه اشهظيمه...خادمه يردوني
جدي محمد وأُمته ضيعوني...خادمه يردوني
* * *
للطفله صدت زينب إو نادتها...هيجتي ونيني
ذبحة أبوچ إلچبدتي صابتها...ومولح أصبي عيني
عمتچ السطوات الدهر حملتها...وإنتي إتساعديني
نادت يعمه...خادمه يردوني
فـوگ السياط اليبست لي إمتوني...خادمه يردوني
* * *
شحمل يعمه امن الدهر چم لوعه...او شيصير دليلي
والخيزران الجسمي رض اضلوعه...واليسر هد حيلي
وانحفر جفني من مسيل ادموعه...او لا نمت كل ليلي
وأعظم مصيبه...خادمه يردوني
من عگب خدري اوعزتي ذلوني...خادمه يردوني
* * *
شذكر يعمه إمن الدهـر وإعلومه...اوشحمل يا رزيه
أبچي اعله ولياني العفتهم نومه...ابوادي الغاضريه
لوعالرضيع ابحربة المسمومه...جرعوه المنيه
واليتمونـي...خادمه يردوني
من عگب ما ذبحو هلي إو فجعوني...خادمه يردوني
* * *
شيصير گلبي او شيحمل من دهـره...او شيهوّد ونينه
يون اعله أبويه العفته فوگ الغبره...راسه گاطعينه
والخيل رضت بالحوافر صدره...ابدمّه إمغسلينه
مفگـود أبويه...خادمه يردوني
حگ لو عميت من البواچي إعيوني...خادمه يردوني
* * *
شيصير گلبي والحنين اتولاه...إوشيبطل حنينه
ويحن على الگطعو يساره او يمناه...والسهم صك عينه
اتمنيت عمي عدل والساعه أنخاه...والرايه إبيمينه
وأشچيله حالي...خادمه يردوني
لوعـدل عمي چان ما يسروني...خادمه يردوني
***
شيصير گلبي والهظم متراكم...والهظم ما ينشال
ايحن علي الاكبر لو يحن الجاسم...لو يحـن الهالحال
لو چان ابن عمي ابيمينه الصارم...متچتفت بحبال
وابگه غريبه...خادمه ردوني
لا ياهلي ابديرة غرب عفتوني...خادمه يردوني
* * *
عمه الكسرها الدهر ما ساعدها...چيف إيروعوها
عمه الغريبه الما ولي ظل عدها...چيف إيلوعوها ؟
عمه اليتيمه المنفجد والدها...چى يستخدموها ؟
وآنـه العزيزه...خادمه يردوني
ما تغمض اعله الـذل يعمه إجفوني...خادمه يردوني
* * *
