يا جابر
«ميمر مذيل»
عمي يجابر بالنحب ساعدني
لمصـاب أهلنه إو زينب إو غربتها...بالنحب ساعدني
* * *
وإهنا يجابر وگف جدم الميمون...وإندركت الغايه
والگطب رايـة عمي وأفلاك الكون...إندارت عله الرايه
وإهنا يجابر غابت إسباع الكون...إبغايات المنايه
حـن إلحنيني...إو بالنحب ساعدني
وإنحب إعله إبدور الوغه إو غيبتنه...إو بالنحب ساعدني
* * *
عمي يجابر جيم وياي النوح...لمصاب المردني
سهم النوايب صـاب چبدي المجروح...وإصوابه الضهدني
ومن اليسر لا مهجه بيّه إو لا روح...هالمدنف تجدني
حن إعله حـالي...إو بالنحي ساعدني
مولحت عيني إو ذايبه شحمتها...إو بالنحب ساعدني
* * *
عمي يجابر نوح وإنحب وياي...لرجال الحميه
وإبدمعتك ضمد إجـروح البحشاي...من الغاضريه
عمي يجابر هاي دار العز هاي...من العز خليه
نوح إعله عزنه...إو بالنحب ساعدني
إو حـن إعله أهلنه وإنحب إلوحشتها...إو بالنحب ساعدني
* * *
ريتك يجابر حاضر إبهاي الدار...وإتشوف الضياغم
إتشوف الصواوين إلتهلهل أنوار...ببدور الهواشم
إو من عگب ذاك النور لن تسعر نار...بخدور الفواطم
حـن إلخـدرها...إو بالنحب ساعدني
إو للنار تطفي بالدمع جمرتها...إو بالنحب ساعدني
* * *
وإهنا يجابر حاربت عيني النوم...وإسهرت ألليالي
من جابو ألأكبر إمرمل بدموم...إو مددوه إگبالي
والراس من طبرة العبدي مجسوم...وإنجسم دلالي
أندب يالأكبر...إو بالنحب ساعدني
حن إعله طبرة هامته إو شدتها...إو بالنحب ساعدني
* * *
وإهنا يجابر فسرت گلبي ألآه...والونه خفيه
من شفت جاسم حنته فيض إدماه...مرمي إعله الوطيه
ما يسله گلبي جاسم إو لا ينساه...فگده إيعز عليّه
حـن إلشبابه...إو بالنحب ساعدني
وإتحسر إلرمله إو جمر حسرتها...إو بالنحب ساعدني
* * *
وإهنا يجابر وجرت نار إحشاي...من جمرة ونينه
من لفت زينب ولهه مذعوره الراي...وإتصيح إنولينه
إو صاحت يسكنه أيّسي من الماي...إو من حامي الضعينه
حن إعله عمي...إو بالنحب ساعدني
والسكنه روّي بالدمع مهجتها...إو بالنحب ساعدني
* * *
وإهنا يجابر فرفرت مني الروح...إو فارگتني الـراحه
من حرمله صوب دليلي المجروح...وإلتوه سباحه
لأُم الطفل من رد طفلها مذبوح...والسهم ذباحه
عالطفل وأُمه...بالنحب ساعدني
وإبچي إلبچاها وإصرخ إلصرختها...بالنحب ساعدني
* * *
وإهنا يجابر دوت بعضاي النار...إو وافتني الهظيمه
رد المهر خالي من إبن حامي الجار...وإيصيح الظليمه
وإهنا يجابر صار بينه إلما صار...وأخذونه غنيمه
إتصور سبينه...إو بالنحب ساعدني
وحن عالفواطم وإنحب إلضيعتها...إو بالنحب ساعدني
* * *
وإهنا يجابر جدمو هزل النوگ...من جمرة ونينه
إو للطفل لو شفته إبسلاسل مشبوگ...وإتصيح إنولينه
وإهنا يجابر طوگو چبدي إبطوگ...إو من حامي الضعينه
حيلي تضـاعف...إو بالنحب ساعدني
إوشاهد رگبتي الجامعه حفرتها...إو بالنحب ساعدني
* * *
عمي يجابر إخذ من حـالي إعلوم...وإنته إلبي إتشوفه
ممرود عالسلبو حلايلها إلگوم...وإنهدت مچتوفه
لسّا إمخزّن جرح چبدي إو مالوم...من رزايا الكوفه
شاهده إلحالي...إو بالنحب ساعدني
وإتصور الكـوفه إو هظم طبتها...إو بالنحب ساعدني
* * *
والشام آه الشام خلاني الشام...ما تنام إعيوني
إو سهم الشماته بي جـرح ما يلتام...بالچبد جرحوني
بالروس حاير والحرم وألأيتام...ممتحن خلوني
شـوف ألإراده...إو بالنحب ساعدني
إو نرضـه إبحِكِمْة الباري وإبرادتها...إو بالنحب ساعدني
* * *
