عودة السبايا
«العجز هجري + حسيناوي»
دگعد إو شوف إشصـار...وإشجره إبحالي
آنه زينب واليسر...أثر إبگلبي النار
وإشجره إبحالي
* * *
ساير إبسير الفكر...إو دون گبر حسين
وگفت إجدامي
چني واجـف وأنتظر...إعيال مسبيين
إو صدگت أحلامي
إو شاهدت رب الخـدر...تصك بالراحين
والجفن دامي
إو تسحن الـروح إبروح...والدمع هالي
وإلتـروح إميسّره...ما تظل إمخدره
وإصرخت يا ستـار...وإشجره إبحالي
* * *
ريت صك عيني العمه...إو لا تشوف إعيال
تنعه واليها
إو لا شفت بت فاطمه...تمرد الدلال
عالجره إعليها
والضلـوع إمهشمه...من عصي الجمّال
يبست إيديها
إو تصرخ حسين حسين...ثمـر دلالي
وين أروح إبهالحرم...لا چفيل إو لاخيم
لا خدر لا عمّار...وإشجره إبحالي
* * *
إشلون عـد زينب گلب...ما يهم بجروح
سهم غربتها
ولهه متشوف الـدرب...وإبثجيل النوح
تندب إخوتها
إو عينها إتهيل إشتصب...من حريج الروح
ريع بدتها
صابني إبهـاي الدار...إصواب چتالي
وإلسبتني كربله...إو عفت أهلنه إمچتله
وإخوتي وألأنصـار...وإشجره إبحالي
* * *
عالگبر زينب هـوت...تون وإتناديه
آ يوالينه
إسيوف بأرض الطف غدت...جسمك إتگص بيه
وإنگطع بينه
إجروحك الكلفه إكثرت...مو جرح تشفيه
دمعة إسكينه
فاضت إجروحي...إو فاض دمك الغالي
سهم المثلث چبد...گلبك إو گلبي إنمرد
آ يسهم الفجار...وإشجره إبحالي
* * *
صوبتني كربـله...بالعليل إو حال
غربت إعياله
ومن وشيـل السلسله...إو ناظره الهمال
يبس دلاله
والمصيبـه إمفصله...إله إو بالأهوال
صبره يحلاله
يرد سالم ما چان...يخطر إبّالي
وإبوريده الجامعه...شحفرت شمگطعه
وإبـدواه المحتار...وإشجره إبحالي
* * *
إو شفت مكفـوف البصر...من صدر لهّاب
يندب إبحسره
آنه جابر والدهر...خله بيّه إصواب
مهجة الزهره
حسين محزوز النحـر...وإبدليله إنصاب
وإنسحن صدره
ريتني إبـذاك اليوم...دنت آجالي
إو ريت لا طال العمر...إو زينب إلگاها إبيسر
تمشي من دار إلدار...وإشجره إبحالي
* * *
صاب سهم الفاجعه...گلبي المالوم
چبدتي شلها
إو من وصلت المشرعـه...والحريم إتحوم
عالتكفلها
والعقيله إمروّعه...گوم تنده گوم
نومتك خلها
يا گمر هاشم بيك...صدگت آمالي
دللتني إو جاهدت...إچفوف للخوّه بعت
ومصرعك ظل آثار...وإشجره إبحالي
* * *
