الليلة الحسن بالضيف إجاني...أقره بكتاب الطف لقاني
قلي أفتح آخر صفحة و إقراها...عن الأسيرة والجره اوياها
قمت أقره واعيون الحسن تدمع...أنفاسه تصعد للسمه وترجع
والحسره من قلبه ابتدت تطلع...قلت المصيبه اشلون من يسمع
إخته القبل بجفوفه تتقبع...بسياط مو بدموع تتودع
خاف أسكت ويزعل عليه...خاف أقره وأخبار السبية
ينكسر قلبه من سباياها...عن الأسيرة و الجره اوياها
من يا مصيبه أبدي لك أحزانك...من قطعوا بعباس ذرعانك
لو أبدي من ترويع نسوانك...من عطّشوا عالماي رضعانك
لو من مناحر روس خوانك...لو من شمرهم ذبح قرآنك
قلي أبتدي لي بليلة وحشه...واشلون زينب مشت ممشه
واشلون هيج الزمن خلاها...عن الأسيرة و الجره اوياها
زينب وحيده بليل وحشتها...وبغير روس اعله الثره أخوتها
وأختنقت بدخان خيمتها...واجفوف ايديها النار حرقتها
وأطفال تبجي اتريد عمتها...ما صارت ودارت مصيبتها
يالحسن شقره يا مصيبه...عن زينب الظلت غريبه
مسبية لرض الشام ممشاها...عن الأسيرة و الجره اوياها
بس قلت له زينب صاح يا زينب...قام الاسمها ورد قعد ينحب
خاف أحجي كل الحجي وتتعذب...تجويك نار اخيامها التلهب
أختك المنها الناس تتهيب...تنضرب قامت سيدي وتنسب
من جان أخوها القمر عدها...لو حجت من يقدر يردها
شحجي وشقلك عن رزاياها...عن الأسيرة و الجره اوياها
قلت له الكتاب ايقول يالتقره...ماكو فرق زينب من الزهره
رغم الذبح والموت بالعتره...رفعت الدين وعظمت قدره
لا من حجاب الطاح الغبره...لا جيب شقت بت علي الحره
خافت عله النسوه بسبيهن...شدت عبايتها بعبيهن
ولا خالفن كلهن وصاياها...عن الأسيرة و الجره اوياها
ما يحكم المجنون بالعاقل...قالت له يبن ازياد يا قاتل
حكمك وحكم العينك زائل...لا تظن تحجي اوياي يا جاهل
لو هسه يمي حاضر الكافل...جا راسك للأرض نازل
قالت له لو حاضر كفيلي...لا أنت وجيوشك تجيلي
لا ما تذل فد يوم حاشاها...عن الأسيرة و الجره اوياها
كثره المشاهد والأهم وأخطر...ردت يزيد الشانئ الأبتر
من ضرب سوطه كعبة المنحر...شاطت غضب عالصار بت حيدر
صوت الأمين من العرش كبّر...سوف نجازي لبوة الكوثر
لا ما نزل يمهم دمعها...لا ريحهم طفت شمعها
ظلت عظيمة بكل سجاياها...عن الأسيرة و الجره اوياها
فزيت لن دمعي على خدي...ضيف الحسن جان ابحلم عندي
وانطيت وعدي لو أظل وحدي...للموت هذا للحسن عهدي
خادم الزينب بت علي وجندي...حتى ظهور القائم المهدي
واعرفت حلمي عن معاني...راد الحسن هذا التفاني
لخته الأبد ما يوم ينساها...عن الأسيرة و الجره اوياها
