هاي الخرابة و هذا موعدنه...هذا المكان البيه تواعدنه
بسما لا يجيني وإيده مقطوعه...بسما لا يجيني امكسره اضلوعه 
 
أحمل...للخل...شوق العطاشه النزلت المطره
حني...ووني...ون اليمين بطيحة اليسره
وضعي...دمعي...دمع الأمير وخادم ايسطره
نظره...حسره...حسرة شجاع وغلبته الكثره
عيني اعله دربك وانعمت عيني...ابعمر الطفولة وشابت اسنيني
من لوعه أطلع أوقع ابلوعه...بسما لا يجيني امكسره اضلوعه

أصبر...وأذكر...آخر كلامه من ركب مهره
انتي...بنتي...صبراً يبويه والبعد فتره
إني...ظني...هالليله تنشف دمعتي الحمره
أشكي...بلكي...ما أشوفه راجع بثنعش طبره
هالليله حتماً يحضر الغالي...يشكيلي حاله و أشتكي حالي
و امسح دموعي بجمرة ادموعه...بسما لا يجيني امكسره اضلوعه

أمسه...هسه...هاي الخرابه و أنتظر وعده
لهفي...خوفي...باقي أثر للحافر ابخده
صبري...مدري...واشلون أشبقه ورقبه ما عنده
حالي...تالي...أحسب جروحه و جم كسر عنده
خل يجيني ابجثه اموذره...عندي علامه الرفسه البــ صدره
لا ما يغيب وبنته مفجوعه...بسما لا يجيني امكسره اضلوعه

ويلي...ليلي...ليلة لقانه والوعد قرب
أنعي...وأدعي...لحظة وفاتي بجيته يا رب
قيدي...بيدي...ماي العذب وآنا أنتظر و انحب
وحدي...قصدي...حته أقله يالعزيز اشرب
إشرب يضامي وينجلي همي...هاي الأرض ما يسوه جف عمي
كلمة يعمي بروحي مطبوعه...بسما لا يجيني امكسره اضلوعه

أحلف...و أعرف...شكله تغير واختلف شكلي
وني...يعني...حيره شقله وهوه شيقلي
والحل...ما ظل...حادي الضعينه بيه شمخلي
نكبه...صعبه...قيّد إيديه اللي ذبح أهلي
لمن يجيني وبيده ياخذني...يا حيرتي من ينظر الأذني
بالله شجاوب آني مصفوعه...بسما لا يجيني امكسره اضلوعه

عندي...ودي...لمن يجيني الليله والينه
ردته...ببخته...ساعه اعله متني ايخلي جفينه
أضمن...حتماً...أنظر الحافر دايس بعينه
وأنشل...و أسأل...يبن الزجية خنصرك وينه
أصغر مصيبه صعبه أشرحها...بويه اليتيمه احجايه تذبحها
بليل السبايه الونه مسموعه...بسما لا يجيني امكسره اضلوعه

هضمه...ظلمه...هذا الطشت أرعبني من شفته
نحرك...عطرك...رغم المصايب آني ميّزته
احساسك...راسك...مدري شيقلي وآني شابقته
وأفهم...وأعلم...هذا لقاء الوالد ببنته
قلي يبويه اعله الوعد آني...عوفي الخرابه واغفي بأحضاني
جانت يبويه النومة ممنوعه...بسما لا يجيني امكسره اضلوعه