زينب وخطابها للمخيم
«ميمر»
يا دار ضيعتيني...يـا دار خليتيني
حرمه وغريبه إبكربله ومحتاره
* * *
يادار انشدچ ليّه ردي إجـوابي...صوبتي گلبي وما يطيب إصوابي
لو عاتبت ميفيد بيچ إعتابي
يادار صوبتيني...بسهم الشماته إبعيني
والدمع من ريع الگلب يتجاره
* * *
زينب إتنادي وتهمل إدموع العين...يا دار گليلي شلچ عندي دَين
إستافيتي مني دينچ إبدم حسين
يا دار سيبتيني...يا دار وإسبيتيني
وإنهدم بيتي وراحت العمّاره
* * *
يا دار ليش إمن إخوتي إحرمتيني...وعالنهر بيچ إتلولح إصبي عيني
وإنهتك خدري بيچ وإسبيتيني
يا دار وإحرمتيني...من عيني وإصبي عيني
وإحرگتي گلبي ومن يطفي ناره
* * *
زينب أنه وطول الدهـر محجوبه...بزود إخوتي وبيهم چنت مهيوبه
يا دار شو بيچ أصبحت منهوبه
يـا دار يسرتيني...يا دار ذليتيني
يا دار والخدري هدمتي داره
* * *
زينب أنـه إو تحمد إبطاريّ الناس...إمدلـله بزود إخوتي ومرفوعة راس
وبيچ اصبحت منهوبه عگب العباس
يا دار رملتيني...يا دار وإفجعتيني
إبطيحة يمين الهاشمي وبيساره
* * *
يا دار ظني بيبچ هـذا ما چان...تخليني مچتوفه ويسسيرة عدوان
وحته الطفل گومچ تذبحه عطشان
يا دار وإهظمتيني...يا دار روعتيني
يا دار من مثلچ فجع خطاره
* * *
وظليت يا دار الغـرب متحيره...للشام يردوني أروح إميسره
إشلون أمشي وجسوم إخوتي عالغبره
يـا دار شتطلبيني...ضفتچ إو متضيفيني
بالضيف يالمن ساعتچ غداره
* * *
