صبر الحوراء زينب عليها السلام
«فائزي مذيل»
زينب وخـويه حسين...يا دهر تدريني
والصبر إيماني...والعصمه عنواني
يا دهر تدريني
* * *
زينب أنه وبت فاطمه إوعنوانـي صبري...يادهر تدريني
وإنمدت إرگاب الزلم بحدود خدري...يادهر تدريني
يا دهر وإنته إللي چنت تمتثل أمري...يادهر تدريني
ما چنت أظـن بسهام غدرك توافيني
ما تهم روحي بيك...وإشما گويت ألويك
يا دهر تدريني
* * *
يا دهر ربوني هلي إبحجر المعالي...إوحفظو دلالي
وإسيوف هاشم للفلك رفعت جلالي...إوحفظو دلالي
ضحو عمامي وإخوتي إبدمهم الغالي...إوحفظو دلالي
والربـو ألإسلام والدين ربوني
بديار دينيه...وأسرار علميه
يا دهر تدريني
* * *
يادهر لو كل البشر تتفازع إوياك...ميهمني ملگاك
إو بسهام صبري يا دهر فگست عيناك...ميهمني ملگاك
يوم المشابچ يا دهر آنه ألوي يمناك...ميهمني ملگاك
والكوفه والشامات لا تظن تسبيني
سابيني سهم الجـود...والعلم والعامود
يا دهر تدريني
* * *
يا دهر لو شفت الدمه إمن إعيوني فجر...بعيوني أثر
سهم الفگس عين العله الشاطي تگنطر...بعيوني أثر
إو لوشفت من جفني الدمع نار إيتطاير...بعيوني أثر
چني الرضيع إيلوج بيدي ويحاچيني
يا عمه شربت ماي...وآنه إنصبت بچلاي
يا دهر تدريني
* * *
يا دهر وإشچم نايبه إبگلبي سهمها...عندك علمها
ما فنت صبري إو لا فتر روحـي إبعزمها...عندك علمها
لاچن إلمرّد چبدتي إو روحي هظمها...عندك علمها
أحّا يفگـد الچان شمعة صواويني
طبرات ألأكبر هاي...مسـتأصله بحشاي
يا دهر تدريني
* * *
يا دهر وأنته وكربله واليفزع إلها...گلبي حملها
إو ملت دليلي النايبات إو ما يملها...گلبي حملها
تدري إبجمر يا نايبه إلروحـي شعلها...گلبي حملها
جمـرة عرس جسّام بالچبد تچويني
وإبدمه حنيته...إو عالموت زفيته
يا دهر تدريني
* * *
يا دهـر منك ما يمر خوف إعله بالي...وإندهش حالي
لاچن دليلي إتگطع إبمصرع الوالي...وإندهش حالي
ألله من رد المهر والسرج خالي...وإندهش حالي
إو سهم المثلث صاب عيني إو فگس عيني
روحي إوي دم حسين...تتفايض إمن العين
يا دهر تدريني
* * *
