صرخة الحوراء زينب
«فائزي مذيل»
يحسين يبن أمي...خان الدهر بينه
والگوم ضيعونه...للشام يردونه
خان الدهر بينه
* * *
وإمنين إجتني إبكربله هاي المصيبه...وألله إشمصيبه
أفگد عمامي وإخوتـي وأصبح غريبه...وألله إشمصيبه
وجمر المصايب بالگلب وجر لهيبه...وألله إشمصيبه
أحّا يجمرة نـار...فگدك يوالينه
خلانـي مبليه...بعيال مسبيه
خان الدهر بينه
* * *
يبن أمي وإصواب الدهر أثر عليه...بالغاضريه
من طحت من ظهـر المهر فوگ الوطيه...بالغاضريه
يبن أمي عيني المصرعك ظلت إربيه...بالغاضريه
وإنفجع گلبي إو صاح...وين اليحامينه
طاح الموزم طاح...والخدر والعز راح
خان الدهر بينه
* * *
سهم المثلث صابك إو صوب دليلي...وإنهدم حيلي
ظليت أباري إعيالك وما نمت ليلي...وإنهدم حيلي
وإعيوني تربي إعله النهـر وأندب چفيلي...وإنهدم حيلي
وآنـه أدري بالعباس...صاب السهم عينه
أحّا يسهم العين...وإبگطعت الچفين
خان الدهر بينه
* * *
للخيم من رد المهر يسحب إلجامه...صـابن إسهامه
يبن أمي وبوجه المهر دمك علامه...صابن إسهامه
گطع دليلي ومرّد إگلوب اليتامه...صابن إسهامه
وبلا حمه إو دار...يبن أمي مشينه
دگعد إو شوف إشصار...حرگو خيمنه إبنار
خان الدهر بينه
* * *
يبن أمي وأعظم نايبه المرّت علينه...وإحنه إنسبينه
غارت الخيل وفرهدت عزنه إو حلينه...وإحنه إنسبينه
نـار ونهب ومن العصي نشگف بدينه...وإحنه إنسبينه
بين النهب والنـار...يبن أمي ظلينه
بسياط لوعونه...بحبـال چتفونه
خان الدهر بينه
* * *
ورمت إمتوني إمن الضرب وأشگف بديه...وإنگطع بيه
يا ريت أنه إوياك إجرعت كاس المنيه...وإنگطع بيه
و لا أشوف أخوتي إمغسله إبدم الحميه...وإنگطع بيه
گوس الگدر يحسين...صابت نياشينه
خلف إبگلبي إجـروح...والدمع دم إيفوح
خان الدهر بينه
* * *
وإبنك عليل ويشعب الروح إبونينه...ألله يعينـه
دارو إمتونه إبسلسله وإمحددينه...ألله يعينه
وإبگلبه نار الجامعه وجمرة سبينه...ألله يعينه
من يسمع إبچانه...يبچي البواچينه
مفجوع دلاله...واليسر چتاله
خان الدهر بينه
* * *
