ضعن الفـواطم يحسين...طب كربلا حاديها

من اليسر ردن بنات الهادي...الطف كربلا اورجنت ابحنها الوادي
اوعالگبر زينب اوچبت واتنادي
يحسين من كثر ابچاي...عيني نشف جاريها
* * *
يبن أمي من خليتك اعلى الغبره...دم طبره من جسمك يكت ابطبره
بالله الچتل يحسين هين أمره
لاچن يبـو اليمه ليش...لچفوفك امگطعيها ؟
* * *
الجمّال گص چفك الخاتم الخاتم ناله...والطمع غره اوهاي سوء أعماله
لاچن يخويه اشرادت الخياله
يبن أمي لضلوعك ليش...بالحافر امهشميها ؟
* * *
يحسين ما مسلم إلحن الحالك...سهم المثلث جرَّه من دلالك
يبن أمي أدري بالسهم چتالك
اوذاك السهم مسجـي إسموم...والچبدتك ماذيها
* * *
ضامي الگلب يحسين ذبحوك الگوم...اوظليت من شرب الميه محروم
امن الماي هل صح لك غسل يا مظلوم
لو جثتك يا مظلوم...من دمك مغسليها ؟
* * *
يبن أمي ما تگعد تشاهد حالي...ابجمر المصايب منمرد دلالي
زينب أنا المحد يشوف اخيالي
عگب الخـدر للشامات...أمشي ابيسر تاليها
* * *
يحسين يوم اللي مشه حادينه...اعله المعركه اعله اجسومكم مرينه
ردنه الموادع ما حصل بيدينه
يبن أمي واگلوب الـگوم...خوف او رحم مابيها
* * *
يبن أمي ما تدري شنو الأذانه...اوشنهو الهظمنه اوشنهو البچانه
وگفونه بين ايدين ابن مرجانه
بحبـال من إيد الإيد...لطفالك امچتفيها
* * *
واللي جرح گلبي جرح ما يلتام...الشام آه الشام من طبة الشام
الحال الأرامل من أصد والأيتام
تكسر الخـاطر وابنار...گلبي يهيج إعليها
* * *
يحسين والثگل حنيني او نوحي...شاهدت عيني امصاب مارد روحي
ونة عليلك لچم بيها اجروحي
من كثرة الشامت گام...ونْة الگلب يخفيها
* * *
يخفي ونينه لاچن ابروحه ايجود...ما يجزع او راضي ابقضاء المعبود
إيصد اليتاماك اودمع عينه ايجود
تبچي اعله حـاله الأيتام...والونته اتنابيها
* * *