أنـاشد والنشد يلتهب جمرة نار...يا ستار صيحو إوياي يا ستار
هذي كربله وين المخيم صار
والرايـه إلبالحد منشوره...والثايه إلچانت منطوره
* * *
أخبـرك يالتناشد والگلب مجمور...جمرة ظلم وجّت عاشر إبعاشور
حرگت خيم روعت حرم هدمت دور
والرايه إتگنطر راعيها...وإچفوفه إشلون إمگطعيها
* * *
إو بعد النـوب أناشد والعگل مخطوف...إلمن عالشريعه إمگطعات إچفوف
وإلمن هالأجساد إلمالي عين إتشوف
وإبدمها إشلون إمغسليها...وإبذاري الريح إمچفنيها
* * *
إمغسليها إبدمـه وإمچفنه إبتربان...إو عله كل جسم زور إمن النبل والزان
ثلث تيام وإلها ما حصل دفّان
عالغبره إشلـون إيخلوها...وإبذاري الريح إيچفنوها
* * *
إو جسم حسين صاير للنبل مكوّر...إو ميادين إعله صدره لعبت العسكر
إو ما ظل عظم سالم بيه متكسّر
مگطوع الـراس إمخلينه...إو ما راعو حرمة هادينه
* * *
ظل حسين مطروح إو بني عدنان...وأخبرك بالحرم من عگب عز إلچان
لا ظل حمه لا ظل خدر لا صيوان
إوبحبـال الكوفه إمچتفيها...للشام إميسره إموديها
* * *