شكوى طفلة الحسين من ظلم ألأمويين
« حدي»
يبست إدينه إمن العصي...يا زجر ما عندك رحم
وإحنه يتامه إبلا ولي...يا زجر ما عند رحم
* * *
يا زجـر شن هذا الظلم...يبست إدينه إمن الضرب
كلسا تروعنه إبچتل...ثولنه منشوف الدرب
وإجسوم أهلنه إبكربله...ظلت عله وجه الترب
يا زجـر ويانه إبرفج...لتروع إگلوب الحرم
* * *
يا زجر لو راعي العلم...حاضر إوبيده صارمه
ما چنت تگدر يا زجر...تضرب ودايع فاطمه
يا زجر تدري چم متن...بالخيزران إموسمه
والخيزران إعلـه المتن...يمضي مثل مضي السهم
* * *
يا زجر ولاك الدهر...واليولي لا بد ما يعف
وإشكثر گلبك يا زجـر...قاسي ولا جورك يخف
وإحنه يتامه كربله...وإشبيك ضيعت العرف
وأمنه الزچيه فاطمه...إو جدنه النبي سيد ألأمم
* * *
فوگ السبي إو فـوگ اليتم...يا زجر ولاك الدهر
أيتام وإبديرة غرب...وإشمر علينه إبهالسفر
من المشي متفرگسه...رجلينه وإعمانه السفر
وإجـدامنه متحرجه...إو ما يحمل الشوك الجدم
* * *
يا زجر إنته تستچن...وإعيونك إتنام إبرغد
وإحنه عمينه إمن السهر...گلي إشتراوينه بعد
يا زجر گلبك يبتشر...وإشچم طفل گلبه إنمرد
يا زجر هذي راحتك...خلت بالگلوب الولم
* * *
