آني ما أحبك حته تأجرني...لا وأبجي حته تشكرني
آني حبيتك لأن...ما تموت ابكل زمن
ملك...ملك
آني حبيتك لأنك يختلف وضعك...حته ع الرايد يذبحك ينهمل دمعك
انت كلما جاي تعله محد يوقعك...يبست الكلمه اعله شافك لكن انسمعك
ألف وأربع مية عام وثابت ابطبعك...الله قلك طيح مره وللسمه انرفعك
لو أَسِد عيني قلبي يندلك...لو جمر دربك والله أوصل لك
انت للضايع وطن...ما تموت ابكل زمن
ملك...ملك
مره شفتك ع الشريعة وإيدك ابخصرك...ثاري من كلمة يخويه منكسر ظهرك
وأخاه رادوا قتلها ولاذت ابثغرك...جمره من نار المخيم تنطفي ابنحرك
من حسبت اجروح جسمك شفتك اشكبرك...للسهام التخطي صدرك يعتذر صدرك
تنظر أطفالك من يسلبوها...صحت اسحقوني و لا تسحقوها
اسمع اخيامك حجن...ما تموت ابكل زمن
ملك...ملك
كلها سكتت وانت تحجي ابنبرة إحساسك...والهوه كله ملكته ابقطعة أنفاسك
من طحت عالغبره عاري والنذل داسك...داسك وقصده ينزلك وارتفع راسك
والسمه ما شاف صدرك بالظهر باسك...حاول ايطيح ورفعته بـ إيد عباسك
عالرمح راسك راد ينصرني...يالنمت عاري حته تسترني
ميت وتحكم إذن...ما تموت ابكل زمن
ملك...ملك
ما شفت مذبوح مثلك روحه ناسيها...وانت روحك يم خيامك من يطّفيها
من شلت إيدك عرفتك كلمه تحجيها...ردي يا زينب تقلها خايف اعليها
هالله هالله اشبيك رقه لو تبّديها...تمتلي كل الخليقة وهم يظل بيها
الهالسبب روحي هامت ابروحك...والبشر فدوه الأصغر اجروحك
ضامي واهمومك مزن...ما تموت ابكل زمن
ملك...ملك
معركه أُخره شفتها العطش وانته...يالبقيت بماي وجهك والنهر عفته
الماي راد ايبوس ثغرك وانت ما بسته...والطفل من صاح ضامي ابنبله شربته
والمهر هم جان ضامي وانت قدمته...قال لا ما أشربه قبلك يعني علمته
كلشي جننته حته ميمونك...هم بقه ضامي الخاطر اعيونك
قلك اليوم و غداً...ما تموت ابكل زمن
ملك...ملك
ما سمعت الآه منك إلا بس مره...اسمعتها وقلت حتماً أذّو الحره
مستحيل اخيول عشره صدرك اتكسره...اتكسر بحيرة رقية ابخيمه مستعره
اتكسر بونات زينب راسك اتنظره...اتكسر امن الشمر شتّم أمك الزهره
ليك إجت زينب من رجع مهرك...رادت اتشبقك ما لقت صدرك
صاحت أختك بالعلن...ما تموت ابكل زمن
ملك...ملك
قطعه من صدرك شفتها زينب أخذتها...واختلف وضع العقيلة ابيوم شافتها
ثاري هاي القبّلتها امن أمها وصتها...واعله قد القطعه شافت أثر بوستها
رادت اترجعها لكن وين جابتها...من لقت خنصرك يمك يمه دفنتها
قطعه من جبدك امن السهم طاحت...وقطعه بالحافر للخيم راحت
والحوافر أيسّن...ما تموت ابكل زمن
ملك...ملك
