حايرة ابين الثكاله...لا حراسه و لا كفاله
وحيده ابلا أهل ومجتفه ابين العوالي...خلص دمعي و أحرك بالجفن لكنه خالي
بعد شبجي أنا اعيوني تصد روس الغوالي...إذا مسني الهوه ياذي هذا آنه حالي
حزني ما يحصل مثاله...لا حراسه و لا كفاله
اعله راس حسين أباوع والزجر يفتر عليه...وقف عن المشي رمحه لمن طاحت رقيه
ردت أنطيها إيدي اتقوم بس مجتوفه إديه...يعمي اتقلي من السوط ما ظل حيل بيه
والشمر جرني بحباله...لا حراسه و لا كفاله
يراس حسين أون اعذرني لو طاحن بناتك...تره اسياط الشمر ما خلن امتون الخواتك
طويل الممشه للشام وتشوف امخدراتك...رمح طولك صفه وجنه نلوذ ابسد عباتك
راسك ايشاهد عياله...لا حراسه و لا كفاله
حلف سوه الزمان اويه الشمر رايد يذلني...لجن هيهات و آنا ابين راسك والكفلني
نعم جدمي تعب والسوط أخذ كل حيلي مني...المهم راسك يظل عالي وسبيهم ما يهمني
هايه للشامت رساله...لا حراسه و لا كفاله
يمن فوق الرمح راسك يرتل أم حسبتم...تذل زينب فلا والله اصل الذلِ أنتم
يخويه اعله الهزايل امشي و أسمع هل عجبتم...يموت حسين هذا حسين يحجي ما سمعتم
خويه وجهك يا جماله...لا حراسه و لا كفاله
غريبه وعيني حمره امن الدمع واجفوني ذبلن...سياط الشامت بقلبي قهر واجروح خلت
أون من التعب وادموع أخوتي اعليه نزلت...مصايب كربله بعيني صورها ادموع ظلت
عفت الحسين بنباله...لا حراسه و لا كفاله
درب كلش طويل وجدمي بالغربه ايتعثر...سبية وعالهزل وبعيني أشوف الدنيه منحر
تغيّر حته لوني من التراب وشدة الحر...أقولن حسبي الله و أنتظر غايبنه يظهر
انتظر ساعة وصاله...لا حراسه و لا كفاله
