شيبه شيبه...أحسب افراگك عليه
شيبه شيبه...سبحه راسك بين اديه
شيبه شيبه...خطوة الفاگد منيه
 
سبحة الزهره تره امن ايدي خذوها...إقبالي قطعوا خطيها ومن طشروها
طفلة طاحت من ضعنه وما لگوها...وين ما يندار أشوفن راس أبوها
سكته سكته...طاحت الدمعات مني
سكته سكته...خاف شامت سمع وني
سكته سكته...كبرّتني الغاضرية

آنا أمك لو أخت من يا هي أجيلك...راسك بحضني قمت و أرد أشتكيلك
ساعه ألولي المنحرك ساعه الدليلك...آنا محتاره اشيبرد لي غليلك
حيره حيره...افراگ وجهك عطشاني
حيره جيره...بين أعوفك لو أتاني
حيره حيره...و آنا راح أمشي سبية

خويه بعيوني سوالف تفتهمها...من تغمض تذبح الوادم حلمها
خله راسك عالرمح بس ابقه يمها...عالأقل ينقال وياها زلمها
هيبه هيبه...بالرمح تفتر علينه
هيبه هيبه...راسك إشراع السفينه
هيبه هيبه...شايله اعيونك هوية

حسين انت الشيبت مدري أُمنياتي...هوه مو هوه قمت أسأل خواتي
حيل متغير مثل حالي وصفاتي...أرد أسبح شيبك بساعة صلاتي
هيه هيه...الشيبه من طيحت قمرنه
هيه هيه...وطيحتك كسرت ظهرنه
هيه هيه...السلبوا بيها رقية

گبل ساعه ودعت ليل وعمامه...هسه أشوف الصبح متبدي اعله هامه
أدري ما ترجع بعد لينه ابسلامه...آنا حسبالي بده يوم القيامه
خطوه خطوه...لطفالي ايتراوه
خطوه خطوه...وداعتك أمشي برهاوه
خطوه خطوه...لو شبح وجه المنية

سحگت اسنيني المصايب والهضيمه...واقفه بعين العطش يا خويه غيمه
لملميت ارمادهن خيمه اعله خيمه...أقره بالقرآن وآياته الكريمه
خويه خويه...زينب الراحت الأسيره
خويه خويه...لكن بهيئة أميره
خويه خويه...وهيبة العباس بيه

آنا ملتزمه بوصيتك وبقراري...صير حيدر آنا بو ذر الغفاري
حيدرية فاطمية ايظل شعاري...يا حنين وداعتك ما تطفه ناري
رد لي رد لي...يا عطر ذيج المحنّه
رد لي رد لي...ظنتي اتردنه لهلنه
رد لي رد لي...والسوالف هاشمية