صرنه جرح يشبه جرح...آنه ابمتن وانت ابرمح
مسبية نمشي و منذبح...مسبية نمشي و منذبح
گدامي راسك عالرمح وآني أشكي من امتوني...كلما يضربون المتن يم راسك ايودوني
اشلونك گلتلك عالرمح يالما سألت اشلوني...اعيونك غفه بيها الرمل وآنه السهر بعيوني
هالحاله بسما نفترگ...يالخوتك عِشرة صدگ
مسبية نمشي و منذبح...مسبية نمشي و منذبح
حاجيني يالغافي ابجرح وامسهر اعيون أختك...يالما عفتني اويه السبي و لا آنا خويه العفتك
گلتلك و لا عندي عتب وبفرگتك عاذرتك...واعذرني لو ألطم يخي لو مال راسك شفتك
وبروحي ألومن وأنجرح...لو مال راسك بالرمح
مسبية نمشي و منذبح...مسبية نمشي و منذبح
من السيوف اتغيرت وبگلبي ظليت انته...بس رايده اتسولف عليّ مو حلوه هيچ السكته
حرك لي راسك عالرمح لو گلت ذبلت شفته...بالموت لو عندك عذر آنه بوداعك ميته
من گلت لي آخر ملتقه...عمري عله دربك بقه
مسبية نمشي و منذبح...مسبية نمشي و منذبح
لو صدرك بدرب السبي چا سولفت عالداسك...وشما أصد اعله الرمح ما باقي من أنفاسك
بمتوني شمخلي السبي شمسوي خويه براسك...كلما أطيح من الضعن يكبر جرح بحساسك
يضربوني و بإسمك صحت...واتذكرت انت متت
مسبية نمشي و منذبح...مسبية نمشي و منذبح
جرحك مثل جرحي صبح واليوجعك يوجعني...چا ليش كلما سولفت وياك ما تسمعني
وياك إجيت امن الوطن بس يا هو اليرجعني...ما بيه حيل اعله المشي حته الهوه ايوگعني
واتحملت گلبي انگطع...بس خوفي راسك لا يگع
مسبية نمشي و منذبح...مسبية نمشي و منذبح
يا خويه بعيوني حچي هالحاله كلما ألمحك...هاي آنا مو گد فرگتك والرمح مو گد جرحك
واليضرب امتوني ابقصد مرتين راد ايذبحك...لو تدري چم مره متت كلما أگابل رمحك
هم تدري بدروب السبي...متني صفه ابلون العبي
مسبية نمشي و منذبح...مسبية نمشي و منذبح
