صاحب يگول الصاحبه...حين الوصل ظعن السبي
ذاكه العله راس الرمح...وجهه مثل وجه النبي
يا صاحبي هذا الظعن قادم تره من كربله...گالوا خوارج والشمر هوه اليقود القافله
امشي نباوع للضعن نعرف نسب هالعايله...بس الغريب ابهالظعن حته الأطفال امكبله
عدهم فرد واحد عدل...شنهي السبب ما منقتل
يمكن لأن صابه المرض...لو عنده سر يا صاحبي
يا صاحبي وضعي اختلف شنهي التغير يا تره...چني أباوع فاطمه لمن شفت هاي المره
مهيوبه هيه وشامخه عفه وخدر واموقره...چن لبوه لمن تلتفت ما چنها حرمه اميسره
يا صاحبي رايي أختلف...ذوله أهل غيره وشرف
لا مو خوارج واعرفت...هذي دعاية ناصبي
شاف العليل وراحله سلم عليه وبكل خجل...گله يمولاي أعتذر احجي لي شنهو اللي حصل
من يا عشيره سيدي من يا بلد من يا أهل...ليش الرجال اتذبحت وبالمهد هم انقتل
هاي الوقورة اتحن إلك...بت من وأخت من أسالك
ترجف إديها و تنتفض...من ينظر إلها الأجنبي
گله استمع يا سائلي لكن دمع عينه جره...هذا الگلت يشبه نبي ابن الزجية الطاهره
ذيج العله الهزله تون زينب وأبوها حيدره...ذاك الذي ابعينه سهم كافلها سبع القنطره
هذا الشمر شتوصفه...ذابح ابويه امن القفه
ما ظل بعد عدنه زلم...لا هاشمي ولا طالبي
يا سائلي انظر عله هاي اليتيمه اللي بجت...گله شفتها سيدي ابطرف العبايه اتعثرت
تركض عله ذاكه الرمح چالطيره أبد ما وكّرت...هذي رقية الغالية شاء القدر واتيسرت
كل البدور الزاهية...ظلت جثثهم عارية
ما قصرت شمس الظهر...گلت إلها يا شمس أغربي
يا سائلي وعندي طلب وأجرك عله راعي العلم...احجي اويه شيال الرمح خل يمشي قدام الحرم
شيبة أبوي وهيبته تشغلهم وهذا الأهم...تتفرج اعلينه الخلگ فوگ المصايب والألم
نتحمل اشياط الشمر...بس لا ينظرون الخدر
يا سائلي شكراً إلك...حقق إليه مطلبي
رد الصحيب الصاحبه يلطم عله وجهه ابحذر...يا صاحبي آخر خبر ذبحوا محمد عالنهر
ياويلي وامثلث سهم صدره وطلع من الظهر...واخيمهم احترگن سوه والخدر اتصيح المفر
يا صاحبي وزينب تون...كسروا ظهرها والمتن
من تحسب أيتام وحرم...صاح الشمر لا تحسبي
يا هالخلگ غضوا البصر ذني شرف حامي الحمه...زينب إذا تدعي تره دعوتها دعوة فاطمه
لو ترفع اصبع بالدعه فوگ الأرض توگع سمه...هذا الحسين الكوثري تالي يموت امن الضمه
خيل اعوجية السحگته...شالت قسم من جثته
بعتو الضماير والشرف...يعني اشيفيد امعاتبي
