في ظهيرة العاشر

عندما خرَّ الحسين عليه السلام صريعا ، طفحت خيول إبن زياد هاجمة على خيامه عليه السلام فأضرمت فيها النيران ، ففر ألأطفال ودهشت النسوة ، وعلا الصياح ولولا مبادرة الحوراء زينب عليها السلام بإدارة شؤون العائلة وإنقاذ الموقف بمشاورة ألإمام السجاد عليه السلام لكان ما لا يحمد عقباه ، فالشاعر يصور تلك اللحظات الحاسمة ، حيث إضطلعت بمهمة إكمال ثورة أخيها الحسين عليه السلام.

زينب گصدت إتحشم وليها...من خيل العده هجمت عليها
وتنادي رحت وين...يبن أمي يالحسين
* * * * *
خويه هذي الخيل إجتنه إو وصل أولها الخدري
وما بگه عندي اليرد الخيل يا عزتي إو ضخري
گضت بالميدان كلها چتل يبن أمي إو تدري
وإنداست إحدود الخيم...من عگب شيال العلم
ومروعه إگلوب الحرم...والنواظر بگت تذري
وظلينه حرم من هجمت الخيل...شنسوي إو علينه چلچل الليل
ننطي الوجه لا وين...يبن أمي يالحسين
* * * * *
خويه ماني أختك وإجيتك وأنده بإسمك وحشمك
يا بگايه كل أهلنه يبو اليمه إو جيت يمك
خويه أسوم إعليك أبونه إو جدنه وأم الحسن أمك
يگوه يمن بيك العزم...خويه يطاعون الزلم
ما عدنه غيرك يا شهم...يالبعت للدين دمك
إتهب إبشيمتك تنتهض لينه...وإترد العده إلهجمت علينه
إتنشف دمعة العين...يبن أمي يالحسين
* * * * *
خويه تدري الگوم تطلب من أبوك إديون إلها
لفت آل وبني إمعلجه بالطفوف إحضرت كلها
ما كفاها چتل گومك هجمت إعلينه إبحملها
خويه فرد هجمه إهجمت...لله ورسوله ما رعت
لله ورسوله ما رعت...لبست العار إبفعلها
إو وجّو بالخيم يحسين نيران...إو بين الخيل تتعثر النسوان
يا علة التكوين...يبن أمي يالحسين
* * * * *
أطفالكم بالبيده هجت حايره بيها إشيلمها
صار كل واحد إبجبهه والعده تدري إبظلمها
والنسه إنسلبت يخويه إو گبعت إبذاري هظمها
فرت إبوادي كربله...إلچانت مصونه إمدللـه
بس المدامع هامله...شرد إو صفلك سگمها
والسجاد وكل ونه إليونها...لو فوگ الجبل چا جزع منها
وإتفسر غده إطحين...يبن أمي يالحسين
* * * * *
حايره لو صار باچر والركايب حضّروها
إبلا هوادج يا عزيزي إمخدراتك ركبوها
واليتامه إحبال خشنه بالمخاوف چتفوها
ولا واحد الگلبه إنكسر...حن إلبواچيها الصخر
المتربيه إبحجر الفخر...يالعلي وألله ولوها
المتربي إبحضن عزه إو جلاله...تبچي من تصد وإتشوف حاله
وتتلاوع خواتين...يبن أمي يالحسين
* * * * *
خويه كل هذه السمعته إيهون لا چني أرد أنشدك
يا هو اليباري إعيالك وإنت فو الگاع خدك
من عگب حامي الظعينه گلي منهو إيداري أختك
عباس أدري إبشيمته...ما تقبل إبدن غيرته
أجناب تنظر عيلته...إلمن إلمن ضام جهدك
ما يرضه الشهم واحد يجينه...غيره أجنبي إو ينظر علينه
لاچن صوّبه البين...يبن أمي يالحسين
* * * * *
إشلون عندي عين وأنظر راسك إيباري الظعنه
إو جسمك إنخليه رميه يا توالي كل أهلنه
إبلا دفن وإمگطعينه والمثلث يا أملنه
گطع سبابيح الچبد...ضحيته للي ينعبد
لولاك ما تم الحمد...چان ردينه الوثنه
إنت الشيدت للدين رايه...آيه إمحصنه إبنور الولايه
إفتخرت على الكونين...يبن أمي يالحسين
* * * * *