مات الخضار وذبل، وانذهل،
كل غصن شجره
مر الهوه ظل يهب، والعذب،
جرفه إعله خصره
ابحال الخضار والماي والهوه أخبرك
ماتن عليك تعال لو ودي عطرك
چا بيه شيصير .. چا بيه شيصير !!
_________________

يابوي الشجر والماي والنسمات يردنك
ماعدهن هذني احساس واشتاگن يشوفنك
الشجر ينشد عليك الماي وينتظرن خبر منك
چا گلي اشيظل بيها الچانت تلعب ابحظنك
بويه عليك الورد، ينّشد، من كل فراشه
تگول النده مايمر، مو عمر، صفن تماشه
كلشي ابجفاك يصيح ماتت الأماني
هسه انه اموت وراك لو اظل أتاني
وينه الگه تفسير...چا بيه شيصير !!
_________________

الضوه من ايروح كلشي إيموت الوجود تصير بي خله
وحته ابن ادم ابلياه ما يسلم عله شكله
يبويه ظلت ابلياك شتله تسأل ابشتله
الظلام امذبل اغصانچ هم عشتي العشت مثله
كل الوجود انفجع، من سمع، يبقه بدونك
وانته احسب اشگد صعب، عالگلب، فرگة عيونك
كل الوجود يصيح انه ظلتي المن !
سري بعيد علي خل عيوني يعمن
مو حگي لو احير...چا بيه شيصير !!
_________________

اقنعه ابيا عذر گلبي اذا حن بويه بس گلي
من اذكر من چنت يابوي بديـاتك تمشطلي
جرح واحد چنت عندي وصرت عگبك جرح كلي
ويگولن ها هلچ عافوچ اذا مرن الـــبحلي
بالدنيا ماظل طعم، ياعُظم، عن روحي بُعدك
گلبي يظل مايدگ، يختنگ، لو عافه گلبك
وياك الحنان يبوي من رحت خذيته
لكل الطيور عليك همي حجيته
وإعتذرت اتطير...چا بيه شيصير !!
_________________

يفي راسي شمس فرگاك شكلي الچان غيـرته
انه ادعي الوجع من يـروح اشو تالي الرحت انته
ملامح وجهك المحبوب آنه مُستقبلي إعرفته
بواچي اوگعده يم الباب وهلبت يجي وعاذرته
كلشي ابحياتي وضح، من مسح، چفك دمعتك
رافض وداع إعرفت، من شفت، لازم صفحتك
وادعني اريد اشم عطــرك آخر مره
ليش من أجيك تدور وخاطري تكسره
راح انترك غير...چا بيه شيصير !!
_________________

واضح كلشي راح انعاف بس عالأقل وادعني
چفك شيله مني ابعيد اذا ماتگدر اتضمني
يا بويه ابحنان ارباك آخر مره حسسني
انترك من دون اخياتي يابويه اشبدر مني
وين انطي وجهي بعد ، من بعد ، ذيج المحنه
بعيوني كلشي طفه، وما غفه، طير ابـوطنه
حته الطيور تريد انته تبقه يمها
ياعش حنين اذا سافرت يلمها
صار الفضا ازغير...چا بيه شيصير !!
_________________

الفضا بعيوني صار ازغير على الگاع السمه اتدنت
السما ظلمه الگمر هم راح النجوم أسود علي لبست
عليكم موش بس عيناي عيون الماي هم عطشت
ماتت امنيات الگاع ولاشتله بعد خضرت
راح ابقه رغم الألم، للعلم، تتربه عيني
ايحن گلب عمي علي، شلت أدي، هلبت يجيني
معقوله هيچ، نسوچ، كل هلچ يـروحي !
محد اجاچ، خذاچ، نوحي ظلي نوحي
واتنطر الخير...چا بيه شيصير !!
 _________________