أنشودة الزفه...مثل الولد ترفه
حسن شايل حسن...مثل وردة ابغصن
حته الهوه اتغازل...من يمشي يتمايل
بِده ابعينه الزعل...غدت نار وغزل
يا يوم المبارك...بالفرحه نتشارك
طش ابتسامه وباسته رمله بوريده
لا تحسب اسنينه...بس انظر العينه
مثل الأسد من ينظر الصيده البعيده
بجبينه مكتوبه...ما ينسه محبوبه
شبل الهواشم والحرب عيده ونشيده
شّمر عله ازنوده...يتبختر بزوده
سيف المنايه لو ورد لو شمعه بيده
سبعين ألف صارم...حاضر عرس جاسم
خلص وكت الشمع...إجه وكت الفزع
لا تنظر اهلاله...انظر عله أفعاله
إجه العمه ابخجل...غدت نار وغزل
يا عمي خليني...هالفرصه تنطيني
والله أقر عينك إذا أشهر حسامي
جربني واعيونك...هم آني مجنونك
صدق ولا بيهم رجل يثبت أمامي
شبل الحسن آني...بالصعبة تلقاني
اسمحلي ابدي بصولتي وأثبت كلامي
من هلهلت رمله...صار العرس أحله
قلها ييمه رقبتي فدوه العمامي
يا يمه شجعيني...للحومه زفيني
ألف مره أنقتل...ولا لحظه أذل
ييمه شمتاني...محبوبي ناداني
شبه كوكب نزل...غدت نار وغزل
لاح ابظهر غوجه...طار الشعر موجه
ثاري إذا مس الزعل يظهر جماله
مثل السهم رايح...مثل الضوه واضح
من تنظر اثياب العرس تعرف دلاله
من يحجي وي روحه...يتناثر املوحه
ما يحله للناس الزعل لكن حلاله
دز إلهم إنذاره...وي نسمة اعصاره
واتخلخل الجيش وصفه ايمينه بشماله
يضحك يزعلهم...مستهزأ بكلهم
نمر من يصتنت...صقر من يلتفت
صفنهم بشكله...وأربكهم بفعله
جدح غيظ وحمل...غدت نار وغزل
جن عاصفه بصحره وازدادت الغبره
هذا الولد ذوقه حلو حته بقتاله
رمله اويه عماته...شافن مهاراته
هاي الرشاقه من علي وهاي البساله
ما ينلزم طبعه...يتحرك بسرعه
جم آيه من عين الحسد عمه قراله
والطاغي وأزلامه...مهزومه قدامه
كلما بده بيه التعب يسبق خياله
طير العطش شافه...وكر عله اشفافه
صفوا بيده خشب...و اهو نار ولهب
جاسم ولاغيره...حيهم يبو الغيره
خزرهم وارتجل...غدت نار وغزل
من دقِته وحرصه...ما حصلّو فرصه
صاحو شنو حلكم إذا عدكم درايه
هذا الولد عنده...خِبرة علي جده
شتت جحافلنه تره ما كو نهايه
ما بيه ولا لوله...ما طخ مشه بطوله
جاسم تره بفن الحرب عنده هوايه
متنومس بزفته...و يأشر العمته
يا عمه واعيونج أبد ما أخلي رايه
صار الهوه بكيفه...ويهوس ابسيفه
يمر بيهم خطف...جبل ما بيه ضعف
يا رمله شتزفيه...هذا العرس يكفيه
إذا عوده ذبل...غدت نار وغزل
شسع النعل وكته...من انقطع حته
ينزل يشده ونزلت الفارس كلافه
فعلاً نزل شده...معناها يتحده
جاسم مهمه بالحرب عنده القيافه
واليطعن بغفله...عند العرب فشله
وبغفله ضربوا هامته والله وسافه
والدم صبغ خده...واحمرة الورده
يا وسف سجين الغدر يذبح ترافه
ظل يرفس برجله...رفسة قلب رمله
وإجاه عمه ركض...طوه بجدمه الأرض
صاح وقعد يمه...وبمنحره يشمه
بدر هسه اكتمل...غدت نار وغزل
رد بيه للمخيم...طير وسبح بالدم
واتلقته زينب مثل رمله الغريبه
صاحت دقعدنه...وبدمه يتحنه
قومن نزفه بطبرته زفه رهيبه
يا سكنه يا ليله...يا رمله هوسيله
هيه مصيبه ومرحبا بهاي المصيبه
واشموعه وجنها...والحنه دوفنها
والنية سكنه بلكت الرايح نجيبه
يا رمله مو بيدي...جاسم تره اوليدي
إلج ونه معي...وأنا اعليه النعي
بالوسطه خلنه...ونن فرد ونه
وحق عين الكفل...غدت نار وغزل
