يا نجمه لو شفتي القمر...يم النهر روحيله
زينبكم بليل السفر...شبعت قهر واحجيله
هذا أنت يا وجه الصبح...لو هذا قلبي اعله الرمح
أخذوني عميه اعله الهزل ما أدري وين المسره...آنا أدري أخوي اشقد وفي عنده الوفه اعله الفطره
يعرفني بس قائد خدر ما صير قائد أسره...شيريد جفين ويجي إخذيله يمنه ويسره
قوليله وديله هوه انطيه ضوه ويرجعلي...تسقيه دمعتي امن الدمه انطيه دمه ويفزعلي
أعتب بعد لو ينجرح...لو هذا قلبي اعله الرمح
عباس جان امن الزغر يحجيله عالعاشقته...ويحبها وتحبه برغم ما شافها وشايفته
من يلتقي اوياها ابشرط من يمها ويعوف أخته...والصدفه صارت والتقوا راعي الوفه ومشرعته
قوليله شوق المشرعه ما قطعه قطعني...يالغافي بأحضان النهر آنا السهر ضيعني
واجروحي عاشرهن ملح...لو هذا قلبي اعله الرمح
قلت إلها شيقول أنتظر لو هاي هيه أتيسر...قالت لي حماي الضعن مقطوعه إديه والمنحر
قلت إلها أعرفه بنخوتي ميت وما يتعذر...قالت لي عرقة غيرته ماي الفرات اتبخر
مو قال مهلاً عالسبي بنت النبي اشتتمهل...جابوا الهودج وانتهت وأخته ركبت عالمحمل
ما أشرح ايطول الشرح...لو هذا قلبي اعله الرمح
قوليله وي وادم غرب مشيتها زينب كلفه...غطي الخيال ابرايتك شافته اعيون الصلفه
وأطفالك إحبال السبي توجع وإديهم ترفه...يا حره مثلي امجتفه ما تدري وين المنفه
حاجيني وين انطي الوجه وين أنتبه ما أدري...جم طفل يبجي امن الضمه من معصمه الدم يجري
والليل بغيابك وكح...لو هذا قلبي اعله الرمح
حاجيت راسه اعله الرمح خجلان ما جاوبني...يا نجمه حاجيلي الجسد بلكي الجسد يسمعني
ليش امن أباوع للسمه ابرمحه الشمر يدفعني...يدريني إذا شفت القمر عباس أشوفك يعني
اتمنيت أشوفه ولو حلم بس المهم أحجيله...وأبجيله من عيني نهر وأعتب دهر وأشكيله
أسمع نبض قلبه السمح...لو هذا قلبي اعله الرمح
معقوله أصيحه و ما يرد و أحتاج إله و ما يفزع...عباس إذا صيحن يجي قبل الصده ما يرجع
آنا أقطع بروح أعتقد بس هوه لا ما يقطع...كل هذا بيه و ما دره معناها أخويه امقطع
سلميلي عله الغالي بعد هذا الوعد يا نجمه...واشكيله جرح البلقلب وبيا ذنب يلجمه
قولي له مثلك ما يصح...لو هذا قلبي اعله الرمح
أمشي وعله الله والصبر والراي راي الهزل...تعثر وأطيح اعله الدرب ويسبني شامت وأقبل
ما خاف وآني البلضعن بعد الكفيل أتكفل...يا نجمه مو سهله الشمس بالليل من تتوسل
راح أدخل ابزودي القصر راح انتصر وبزودك...و اتباهه قدام الشمر أبقه أفتخر بزنودك
ما عندي وياهم صلح...لو هذا قلبي اعله الرمح
