عله بميلادك الصوت...نحبك والله للموت
دليلي بفرحه ناداكم...نعيش انموت وياكم
عله بميلادك الصوت...نحبك والله للموت
سيدي رب البريه وضّح بمحكم الآيه
ليس للانسان إلا ما سعى ابحكمه ودرايه
و من وعينه بجد سعينه نلتمس درب الهدايه
وحققنه بالجد والسعي...غايتنه عن كامل وعي
ونفخر لونه نندعي...انت يحسين إلنه غايه
بمحبتك ذابت اقلوب...ينور الله يمحبوب
هويناكم عشقناكم...نعيش انموت وياكم
سيدي والقلب لو حب تستعر جمرة لهيبه
وجم دليل الذاب منها بلهفته وشوقه الحبيبه
ومو عجيبه لون ذبنه بحبك انت مو عجيبه
الرضعتنه حنيه ووفه...مزجتها حب وعاطفه
إلكم يسبط المصطفه...وكلمن يسوقه حليبه
حليبي الراضعه دين...لزمني بحب الحسين
فرض حبنه ولزمناكم...نعيش انموت وياكم
سيدي ومكنون حبك حير الدلال طبعه
مره يتوسد اجروحه ويرتسم بعيوني دمعه
ومره يتجسد بروحي فرح تتبسلمه شمعه
حبك ادموعي الترتسم...لو ضوه اشموعي التبتسم
طلسم حبك طلسم...والعشق بأسراره روعه
إلك ما بين الضلوع...فرح وأشواق وادموع
يا من سرنه ميخفاكم...نعيش انموت وياكم
سيدي واليخفي سره ينكشف سره ابكلامه
طالع احروف القصيده وشوف دلالي ومرامه
انت حبنه وبيك ذبنه وما نعوفك للقيامه
من تجتمع يوم الحشر...ملة هده وملة كفر
ليكم يبن طاها نفر...وكلمن يلوذ بإمامه
عهد يحسين وياك...إلى يوم الحشر ذاك
أبد ههيات ننساكم...نعيش انموت وياكم
سيدي وننساك حاشه وانت تجسيد المعاني
التضحيه العزه العزيمه الإيثار التفاني
الكرامه يبو الغيره الجسدتها ابكل كياني
يحسين كل ليل وفجر...يحسين كل نسمه التمر
يحسين يا كل العمر...ما يمل منك لساني
سعيده ابحبك الروح...يبلسم كل الجروح
انا العايش بذكراكم...نعيش انموت وياكم
فاضت ادموع المصيبه وما درت هالليله فرحه
لكن الفاجد حبيبه ابيا ضماد ايطيب جرحه
يبو اليمه البعد ظلمه وتدري عين الدنيه وكحه
بعدتنه عن قبرك غصب...والعين دم تهمي وتصب
جا يمته للحضره نطب...ويطر هذا الليل صبحه
يمرن بينه جم عام...نعيّد لكن ايتام
يبو السجاد ننخاكم...نعيش انموت وياكم
