هل شعبان بأعياده...حسين حسين
ثالث يوم ميلاده...حسين حسين
بجفوفي أغصان الورد مغروسه...و الابتسامة حرة ما محبوسه
بباب الحسين اليوم حلوه الهوسه...باب الله هذا و الموالي ايبوسه
عيسه بسمه السابع ضرب ناقوسه...و اليوم طريت البحر يا موسه
قلبي اليوم تغريده...غير حسين ما ريده
شفنه العيد من عيده...خلها اتموت حُسّاده
هاليوم حيدر معلن بأفراحه...حسين نص الليل طر مصباحه
محبوب و اوجوه التحب وضاحه...حته الشموع التنجوي مرتاحه
جبريل ينثر عالأرض قداحه...و اليوم فطرس يستعيد اجناحه
نظرت شوق معسوله...فرحه اتريد هلهوله
بمهده اسيوف مسلوله...دق للدين أوتاده
عباس أول ما بده مولوده...حيدر إجاه يقبله بزنوده
هذا البطل هذا اليوافي اوعوده...عباس هذا من يجي لحدوده
زينب تبوسه بعينه مو بخدوده...عباس خويه بوستي مقصوده
يا عباس يالغالي...من هاليوم كفّالي
عينك دوم تبرالي...آنا اوياك فذ راده
عباس أول مولده بيه آيه...فسرها حيدر و الكلام اهوايه
من طاح شال ايمينه شنهي الغايه...حيدر يقول ايدور اعله الرايه
باوع الزينب و انطه أخته احجايه...قال إلها موعدنه عله امسنايه
باس حسين عباسه...حته يعيش بأنفاسه
كأنه ايقول بحساسه...آنا الجيش و القادة
اليوم آيات الشعر محتاره...بزين العباد و مولده و أنواره
أسرار كل الأنبياء أسراره...هاجر تحمله و التقمطه ساره
ملهوفه سيقان العرش لنظاره...زار النبي و زار العرش من زاره
إشراقات قدسية...نوره أقمار شمسية
و النظرات همسية...فتحت باب أمجاده
مبعوث من رب العرش جبريله...باقة ورد للمصطفه و تهليله
هالليله فرحتنه بكبر تعجيله...مولد أبو صالح المهدي الليله
شايل عله اجروحي شمع و اشكيله...بر و بحر وادي و جبل يدعيله
بالمولود نادينه...رفعت راس مهدينه
من ايعود والينه...ياخذ ثار أجداده
