ميلاد حامي الجار والينه...وانقدم الليله تهانينه
ميلاد حامي الجار داحي الباب...والفرح لينه بهالولاده طاب
زفوا التهاني لعد شيب وشاب...شع نور أبو الحملات حامينه
وانقدم الليله تهانينه
انولد بالكعبه علي الكرار...والفلك ابسر هالولاده إندار
واجب انهني المصطفه المختار...هاي الولاده للبشر عينه
وانقدم الليله تهانينه
الكعبه تتباهه بعلي وتقول...للحق ظهر نور ورحمه ومسؤل
واللي يحبه بالقيامه اينول...صك الشفاعه بأمر بارينه
وانقدم الليله تهانينه
وانولد حيدر والد الطيبين...نور العداله وشرف لهل الدين
هذا أمر من ساعة التكوين...يا هله بحامي الحمه وتكوينه
وانقدم الليله تهانينه
انولد والكون ابتهج بأسرار...وبمولد الكرار نور ونار
نور الموالي ونار للأشرار...واتعين وبأمر الله تعيينه
وانقدم الليله تهانينه
نعم الوصي انولد للهادي...وبرغم كل اليضد ويعادي
قلب المحب بكل وفه اينادي...حيدر وصي النبي هادينه
وانقدم الليله تهانينه
العمل طيب وزادت أعماله...ويصوم ويصليه ابكل حاله
لكن محبة حيدره ماله...تفشل أعماله وصفر إيدينه
وانقدم الليله تهانينه
واليبغض الكرار خل يعلم...بالحشر لو لحسابه يتقدم
كل عذر أبداً ما إله ويندم...ويصيح وين الغشني جاوينه
وانقدم الليله تهانينه
لكن اللي حب حيدر بقلبه...يوم القيامه تسهل الحسبه
يشفع إله حيدر بأمر ربه...ومن اللظى هوه الينجينه
وانقدم الليله تهانينه
