مسلم حياة الروح...ما نرضه ثاره يروح
بالكوفه مهما صار...ما ننسه هذا الثار
مسلم حياة الروح...ما نرضه ثاره يروح
من طلع من طيبه الضعن وأقبل عله الوديان
لن الفرزدق بالدرب لاقه بني عدنان
ناداهم اشعدكم خبر مسلم عظيم الشان
بالكوفه سحبوا جثته وبيه غدرت العدوان
من سمعوا بهالصوت...شهروا سيوف الموت
صاحوا اشها الاخبار...ما ننسه هذا الثار
لمن سمع هذا الخبر لن صاح أبو السجاد
يا بني عمي وأخوتي وأصحابي والأولاد
ردوا ضعنكم واتجه وحدي اعله آل ازياد
صاحوا عقب مسلم بعد هالعمر ما ينراد
مسلم قضه واشلون...من بعده تغفه اعيون
يبن النبي المختار...ما ننسه هذا الثار
صاحوا بني هاشم نرد يبن النبي لاوين
وللكوفه وحدك تتجه تأبه النفس يحسين
قوم آل أميه من بدر تطلبنه ثار ودين
واليوم مسلم غدرته ومسلم صبي العين
نجري الدمع شفيد...ثار ابن عمنه انريد
اطلب اشما تختار...ما ننسه هذا الثار
مسلم الكوفه خانته ودارت عليه اصفوف
وياك نمشي سيدي وعينك هناك اتشوف
والله لو كل البشر تشهر علينه اسيوف
ما نرتهب يبن النبي ولاندري شنهو الخوف
مسلم قصدهم ضيف...رفعوا عليه السيف
خل تسمع الأشرار...ما ننسه هذا الثار
بعثوا لك الكوفه كتب والكتب كلها اوياك
وأرسلت مسلم بالأثر ياخذ البيعه هناك
غدرت بمسلم وأصبحت تنتظر سفك ادماك
جانوا أصحابك بالأمس صاروا اليوم اعداك
يا صاحب الإحساس...تعرف خفايه الناس
وشما تمر أدوار...ما ننسه هذا الثار
مسلم أعز من النظر اسمه بفكرنه ايدور
حيف ووسافه ابلا ذنب دمه صبح مهدور
مسلم فداك بمنحره ومثله نقدم انحور
والكوفه تدري اتعودت عالغدر واعله الجور
لا مبدأ ولا دين...عالغدر متعودين
خل يفهم الغدار...ما ننسه هذا الثار
من بعد هالحاله البدت ما سالوا العبرات
سرجوا خيول الموزمه اتحزموا للثارات
معلومه هاشم بالفخر تحمل هضم هيهات
ابهالصفوة ما مات الأمل حين ابن عمهم مات
حلفوا برب الكون...بالضعن ميرجعون
وصاحوا بكل إصرار...ما ننسه هذا الثار
