أظلم اعله احسين جوها اوضاگت ابعينه الفله...حين شاف الزان شابچ فوگ راس أمدللـه

حين شاف ابنه الاكبر شابچه اعليه الرماح...اومفترش شوچ النشاشيب اوگابع بالسلاح
ضحك مستبشر اودمعه حمر عالوجنات ساح...اوگاللـه امهنّه يالاكبر جاوزيت المرجله

اولا عجب يبني يالاكبر من تعدّيت الحدود...بالمراجل والفراسه الباسله اوطلعت الجود
انته من عصبه ابشرفها اوزودها اعداهم شهود...اوهذا ما بالفخر شبهه التشهد العدوان اله

اوحين عرّضتك يالاكبر للسيوف اوللسهام...من بعد جيمة اصحابي گبل الاخوه والعمام
جود منّي بيك عالدين يضيغم يضرغام...وآنه ابوك الندب والجود محلّه اومنهله

يبني میّزنه الباري من جميع العالمين...مثل ما من الحصه امتاز ضوه الدر الثمين
واحمدت فضلك الدنيه اوشكر سعوانك الدين...وادركت سعوان جدّك والدي عقد الوله

لاچن امصابك يچبدي فگد من عندي الچبد...اويظل حي بالدنيه امحال الچبده ينفگد
ريتني گبلك يالاكبر يلم چثماني اللّحد...اولا اشوفنّك ابعيناي جديل ابكربله

روحي المابين جنبي يبني يابدر الشباب...اشلون عيني اتشوف روحي ثاويه فوگ التراب
يبني اوطعناتك المايكون الهن احساب...عشر من حزني عله فرگاك البي گلبي ابتله

لون ما يدركني الله يبني بمياه الحكم...نار فگدانك خذتني وانضجت منّي الجسم
يا تره هالكون الاسود علي وجموع الزلم...اهون امن اصواب فرگاك اوحرگة مشعله

العفه لا على الدنيه ياشبيه المصطفه...لاچن اعله الكون وهله بعدك اعليه العفه
ظل عليك الگلب منّي طير چنّه اعله اسعفه...اوحدره صیّاده اويره الحوم يريد ايجندله

اولون ما أعلم يشبلي خلفك انجد عالاثر...لعدم العالم وجوده اولگطع اوتين الدهر
لاچن اصبر عالشدايد مثلما عودي صبر...على امصاب الزهره وهو للرسول ایغسّله

يبني واحتسبك على اللّي ماسِوا حَي ينّدب...ما يفوته بالدهر فوت ولا يخفي ذنب
ناده بشبول الهواشم يا آل عبد المطّلب...دونكم شيلو عزيزي للخيم والعايله

غدت كلما تزم جانب منّه اوبي تنتهض...یگع ياويلي امن اديها منّه جانب عالارض
حتّه للصيوان جابوه اومنّه طول عرض...خذم والبین ابرهيفه وبسنانه امفصّله

هاجت ابنات الرساله امن الخيم يتصارخن...شابچه العشره على الهام اوبالرمضه ايعدن
حتّه الريحانة احسين الأكبر من لفن...هون من شافنّه فوگه مثل مهوه اهل البله

واحده اتحبّه ابوجنته اووحده ابصدره تشم...اووحده تتخضّب ابدمّه اووحده الجسمه تلم
اووحده اتخمّش ابخدها اوّحده تشچيله اليتم...ريحانة احسين وهواه اوبدر الّذي ايشع بالفله

اوسالت على اخدوده دماه اوحين الوگع عوده لفاه...اوسيفه بالاكوان اولواه طاح اوعليه حالة عداه
اموذّر على الغبره لگاه...اوصار ما يمتاز لحمه من يويلي امفاصله