امصاب للميعاد ناره بالضماير تشتعل...سگط حمل الطهر بالباب اوعبد الله الطفل

آه يالمبعوث رحمه اوخير لاچن لـمّتك...ودّعتها انوار بدرين اكتاب اوعترتك
بادرت خيرك ابشرها اوبالمراهف وافتك...حرّفت آيات الكتاب او گطعتلك نسل

مطّلع بالحال واعليك فلا والله ايخفه...اوماسوه حيدر وصيّك واحدٍ الك وفه
روحك ابجسمه اوروحه ابجثّتك يالمصطفه...انته اوهوّ منّك فرعك اوانتَه الأصل

اثبت الباري ابنبوتك بين جمع العالمين...بالوصي حيدر الكرّار اوقرآنه المبين
واثبت اولاية وصيّك ياشفيع المذنبين...ابحمر جيد احسين وابنه الطوّگوه امن النبل

هاي ذات امّتك ويّاك ابوجدان العدم...اخَس وانجس واشر واتعس من امم تعبد صنم
طفل ما رحمولك الگوم رموا گلبه ابسهم...لا رحمها الله ابحشرها اوزاد تعذيب العجل

بالوسيعه انهار أربعه واربعه ابجنة الحشر...ملك للبضعة امن الله ولهه من حيدر مهر
شربه ما يستحق بالماي رضيعج يالطهر
صوّبوا بيد ابو اليمّه...اوشرب دون الماي دمّه
ساعد الله مهجة امّه
اشلون من شافت چبدها ظل چبد عدها عدل

اخذته اسكينه امن ابوها للرضيع اوشالته...اوحبّته بصواب گلبه اوللمخيّم جابته
اوخلّته ياويل گلبي ابين امّه وعمّته
عج يويلي النوح منهن...على احسین اوحال ابنهن
وَن بنات الدوح ونهن...اوحَن فصيل النوگ حنهن
اومن ضمايرهن شضایه ادموعهن لجله تهل

آه لـمّن شافته امّه اوليدها ابدمّه انفطم...وابرگبته يلمع الطوگ اولاچنّه سهم
نادته حيّاك يبني للحرب جدمك جدم...والنده ابثغرك مدره اوعالصنادید اتحمل

يبني ياعبد الله حيّاك يمفطور الگلب...بالمهد تحمل على الخيل ابميدان الحرب
اوما یچبدي اعليك دمعي ينتسب منّه يصب...لاچن الواجب عليّه ايكون افرح وابتهل

حيث لـمّن صاح عودك بالحرب هل من معين...جاوبت لبيّك عبدك ياحسين اوياحسين
اوخضت بحر الحرب هلّي جدّلوك المشرچین...واليخوض الحرب لابد بالصوارم ينچتل

ياسواد الوجه منكم يهل العراگ الأنذال...غيركم ما بالبريّه افراد تذبح بالأطفال
بالحرب تشفي عللها الرجال امن الرجال...ما سمعنه ابدم الاطفال يداوون العلل