عالارُض صارت بيك   تُربَة كَربله
تِسجِد عليها إوجوه    باء البَسمَله

كِل الوِجوه إبطين   گبرَك تِنمِسِح
من غيرك الاسلام    طير إبلا جِنِح
كل اليشوفك فوگ   رُمحَك مِنذِبِح
شافك جبل مرفوع   مو راس إبرُمِح
مِثلَك جبل ماشوف    شايل كاهِله
كل هالحزِن وإيصيح    نِعمَه إونازِله

صَدرَك يِضَل إيصيح    بخيول الحِقِد
لَتضِن عِطِر ينداس    يالدِسْت الورِد
بين الصدر والأيد      وقّعنَه العَقِد
يجمعنه حُب إحسين    كل ما نبتِعِد
حُبّك شعائر دين     لَتضِن زائِله
كل هالسنين وبيك   ضَلّت ماثِله

كِل ما أشوفَن ماي    وچفوف ونَهَر
يحسين أصيحن وين     ثار المُنتظَر
من حُبّي للعبّاس      حَبّيت السَهَر
حتّه أگضي طول الليل    عيني إعله الگُمَر
حَتّه أحچي ويّه إدموع      عيني الهامِله
كل دمعه لجل إحسين     حِجّه إمسجّله

لوشارب إنته الماي     دينك ماروه
لوما گمرنه إيغيب     ماعشنه إبضوه
لوماحَرِگ بخيام       مانِشتَم هِوه
لومَه الأنصار إتموت    مَنْقاتِل سِوه
عِشنه القضيّه وياك    بأخطر مَرحَله
من رادو إيبَرّون     نَبلَة حَرمَله

نِشهد يبو الاحرار     من شهرك يهِل
للطم عدنه إصدور       بالدم تشتعِل
هاي الشعائر بيت       وإيلِم الشَمِل
لا موجنون إعقول       بَلْ نِعمَة عَقِل
تبقه الشعائر صوت      مثل الزلزله
ترسِم ثقافة دين      شيعي إبأكمَله

غيرك يبوالسجّاد       خَسران اليحِب
لَيْضِن على العِشّاگ    عاشِگ ينحِسِب
وَأنصح الراد إيصير      خادِم ينكِتِب
لَيخَلّي ماي إبليس     بالماي العذِب
لايبچي لجْل إحسين     وإيحِب قاتِله
يرفضها أبو السجاد     هاي الشاكِله

يَم مُختبر عباس           حَلَّلنه الدِمه
وگال النتايج غاد       يم حامي الحمه
دم واحد إومختوم         حِسن الخاتِمه
دَم صِنفه حُب إحسين     زائد فاطِمه
دَم إثنَعَش معصوم     حُبهُم شاغِله
وِجهَة طريق إحسين     عنده البَوصَله