[ في مصرع سفير الحسين (ع) مسلم بن عقیل (ع) ]
جد یا طارشي برسالة الدين
واوصل صاحب الشان...ماجد آل عدنان
واصرخ وين...ابو السجّاد الحسين
مسلم على التربان...خانت بيه كوفان
ما بين ابن حیدر گاطع البيد...بشبول المذاوید
فوگ انعام چنها اصگور للصيد...لرض اعراگها اتريد
لن راكب ابثوبه ايلوّح الأيد...اويُومي ابمعصب اوايد
وگف ضنوة الكرّار...اوريحانة المختار
والضيغم المغوار...ناده والچبد نار
أظن والله يالأنصار...طارش حامل أخبار
وأعلمني ابسرّه طاير البين...والعالم الرحمن
خالج كل الأكوان
ما بين الغوالب وهم يسرون...ابذچر الدين يحدون
ساعه اوثانيتها ما يحسّون...اولن طارش يشوفون
داروا بيه دور اللاّم والنون...اوشافوا وجهه مغبون
اوغوجه امحمّل اهموم...اوينبه اوذچر میشوم
نادوا عندك اعلوم...نعم جاوب يهالگوم
مسلم مات مظلوم
بسيوف الطواغيت المشرجين...لاچن مات عطشان
ابصمصام ابن حمران
يشبول الغوالب لو تشوفوه...حين الناس غدروه
اولأبن ازيادهم مچتوف ودّوه...اولديوان جابوه
من سطح الگصر للگاع ذبّوه...اوجدمه ابحبل ربطوه
اوبي گاموا يسحبون...اوهاني اوياه مرهون
چبده ابرمح مطعون...جليل اعليه يبجون
وله الكل يضحكون
كفر وأنذال ما بيهم مسلمين...نواصب تعبد أوثان
عبيد الآل سفيان
لاچن ياعمام المسلم أفعال...تضرب بيها الامثال
مفرد بين عشرين الف خيّال...فوارس لاچن أنذال
غيوم اوهب عليها اجنوب واشمال...جلاهه اوعالجثث جال
اوسدر منها ایتبسّم...اودمع الگوم يسجم
كفو بالكون مسلم...وبسيفه المحتّم
اودعاهه ابحور من دم
والغير الشهاده ماثنه العين...ما راعته الفرسان
اولا كثرة الجيمان
اوحين ادّه الرساله اعله المذاريب...حنّوا حنّه النيب
اوگالوا جرح ما بالمرهم ايطيب...أي واليعلم الغيب
ناداهم مجدهم يالمشاهيب...جريان الدمع عيب
وآنه عدل بالكون...اومنكم تهمل اعيون
عليكم يخوتي ايهون...لا لابس تونّون
واهل الذل ينحبون...واهل العز يضحكون
مسلم مات عز بين الميادين...ابسيف اورمح وسنان
اوتشهدله الفرسان
