[ موشح للاكبر (ع) ]
برز شبل احسين وبسيفه فتك...ابجیش امیّه اوچم بطل طاح اوهلك
برز مذخور ابو اليمّه والرجه...چوچب ايشع اوزهر ضي الدجه
ما دناله واحد اومنّه نجه...الّه وعله الهرب من سيفه سلك
ما دناله امصيّت اوثابت گلب...الّه اومن هيبته ناله الرعب
وجه الاكبر يزهر ابليل الحرب...بدر ساطع غايب ابّرج الرمك
صال وابظهره المطهم معتلي...غدت سبعين الف تاهت بالخلي
نعم والكفار من جاهه علي...اتريّبت وبصولته صارت ابشك
بعض منهم بي يظن فحل الفحول...وبعض منهم بي يظن حمزه یگول
اوبعض گالوهه الوجه وجه الرسول...اوبعض گالوا مو بشر هذا ملك
عگب هذا انچشف لاتباع الاصنام...لنّه شبل حسين مذخور الاكرام
اید بيهه السيف ويشرج الهام...اوإيد بافلاك السمه ايدير الفلك
اورمحه عصّاة المچلّم والگدر...اومرهفه الطاعون والموت الحمَر
طرد ملچ الموت ما راده ايحظر...والنفوس اتسلمت للباري صك
بین ما متنومس اوذل العده...اوعين الحسين اعله فعله اتشاهده
لن تغير لون الحسین اوغده...بالحزن والوجل والهم اشترك
اوعين ليله شابحهه لابن الطهر...حيث ذابت چبدته اوضاگ الصدر
نادته يحسين بينلي الامر...ايصير لن الگوم صابوا ضنوتك
گالهه سالم اولا يدناله أحد...شحن بجسوم العده افجوج الوهد
لچن يليله اعليه فارس لكد...احذر اعليه تعب لو عزمه برك
طبّي ياليله الطنب من الاطناب...واندعي اوميلي البرگع والحجاب
اسمعت من جدّي دعه الام مستجاب...للولد لو صار محتار ابضنك
طبّت الخيمه اوشعرهه نثرته...ابجاه ابو الزهره يباري اونادته
يمن رديت الحبيبك مهجته...رد علي الاكبر ابعظمة قدرتك
يالعدت ذا النون من لجّة بحر...ابجاه الحسين الّذي گلبه انفطر
رد علي الاكبر ضخر من الدهر...وانته اعلم بالامر ويهون الك
