مرفوعه بأيد العباس .. ياراية المشايه

طول الدرب عين الحسين عليها...والگاع تمشي وياك من تمشيها
محسوبه خطواتك الرايح بيها...رايتك للعباس روح أنطيها
والموقف الما ينقاس .. من يستلمها الرايه
مرفوعه بأيد العباس .. ياراية المشايه

ماشي الحبيب الله وتريد أتزوره...والرايه بأيدك عالچتف منشوره
رايه التگلها أم الحسن ماجوره...يوم القيامه تعيد نفس الصوره
بالمحشر أبين الناس .. تستقبل الوفايه
مرفوعه بأيد العباس .. ياراية المشايه

لامونه عذال شكثر لامونه...وعن أربعين حسين ما منعونه
نمشي اعله طول الگاع من شافونه...حبنه بعضهم گاموا يقدسونه
ونشوفه هذا الأحساس .. ترجم معاني هوايه
مرفوعه بأيد العباس .. ياراية المشاية

عهد المحبه شلون ترضه نبيعه...شيعه ولبوالسجاد نهتف شيعه
باچر عهدنه بالنحر توقيعه...نمشي مشي وبس الحسين نطيعه
وتنادي هاي الانفاس .. غايتنه أشرف غايه
مرفوعه بأيد العباس .. يا راية المشاية

زينب تريد حسين يتلگاها...تمشي وجرح عاشور يمشي وياها
صوت اعله تل الزينبي تلگاها...واجب علينه نمشي وي ممشاها
أم الخدر والنوماس .. هاليله عدها حچايه
مرفوعه بأيد العباس .. يا راية المشايه

هاي المسيره الواضحه ومعروفه...بيها الإمام المهدي يمشي نشوفه
عباس فوگ الرايه خط أحروفه...براية علي ما طاحت من أچفوفه
من طاح مرفوع الراس .. يم الفرات ومايه
مرفوعه بأيد العباس .. ياراية المشايه