آنه اوياك واحد .. والعباس شاهد
ها ياراس الحسين .. ها ياراس الحسين
♦♦♦♦♦
يراس حسين .. ينور العين
نسيت أيامنه الحلوه وليالينه
عشت وياك .. حرام انساك
طيبه عشرتك ما بيهه مو زينه
ركبت النوگ .. دخلت السوگ
لجل عيناك والغالي تعز عينه
يحضن الطير .. يوجه الخير
جبير الخوه ما معقوله ناسينه
بس يالغالي اعذرك .. زين وباگي نحرك
زين وهم كلت زين .. ها ياراس الحسين
♦♦♦♦♦
شتريد اتگول .. منو المسؤول
إنه المسؤوله لا تهتم يبعد آنه
يخي واتهون .. اصير عيون
يبعد الحيل ما گول آنه تعبانه
سهرت الليل .. عبرت الخيل
وعبرت النوگ بس عليك قلقانه
الشمس تاذيك .. ومنو يراضيك
اذا تزعل اصير اوياك زعلانه
وازعل عاليزعلك .. تاج الراس اگلك
وتگلي تأمرين .. ها ياراس الحسين
♦♦♦♦♦
سؤالي الان .. صدك عطشان
حرام الماي من بعدك اذا ضكته
صباح اجروح .. يروح الروح
جم حسين عندي هو بس انته
دموعي اتسيل .. فرات ونيل
وحگك يا حبيبي النوم ما شفته
زمانك راح .. بگيت ارماح
عگبك يا اخو صاير ابو لاخته
اعيوني لا يهمك .. ما دام آنه يمك
تطلبني وفه ودين ها ياراس الحسين
♦♦♦♦♦
كبرنه ازغار .. سوالف نار
وتتذكر بيوم الماتت الزهره
اگعدت وياي .. وبچينه اهواي
لانّه اثنينه اسمعنه الضلع كسره
وعلي من راح .. سمعت اصياح
تگلي يالعزيزه استقبلي الطبره
وجودك جان .. الي اطمئنان
العمر مره يغالي وخوّتك مره
راسك يعني انته .. شگد سولفنه سكته
ما مره گلت وين .. ها ياراس الحسين
♦♦♦♦♦
الحياة ادور .. واجه عاشور
واجيت امن النهر ايدك عله ظهرك
شگلت ياراس .. مشه العباس
وبگيت لوحدك من يوگف بضهرك
بعد ساعات .. اجت لحظات
الزمت نحري عرفت آنه انگطع نحرك
تجيني اصوات .. واحس طبرات
اثنعش طبره الشمر متقصد ايطبرك
بحيدر طبره يبدي .. لحد طبره المهدي
ائمه اثنعش بالعين .. ها ياراس الحسين
♦♦♦♦♦
يحال الحال .. شدهت البال
اشوفك عالرمح وعيوني تحجيلك
يجي القران .. يصير السان
يخويه بثغرك وبالكهف ترتيلك
بعد ايام .. اطب للشام
واخذ من جبهتك صبرك وحيلك
يزيد ايطيح .. بمهب الريح
ويضل ساطع نهارك يالبعت ليلك
وعيونك يخويه .. وآنه بت ابويه
عزّلت الدواويين .. ها ياراس الحسين
