[ موشح بين الريحانتين للاكبر والقاسم (ع) ]
گعد بين الاكبر اوشبل الحسن...احسين وابگلبه ثگب جمر الحزن
نوبه لابنه يصد والجسّام نوب...اوجمر حسراته الصخر منه يذوب
مثل لوب الوالهه الثكله يلوب...اومثل حن الطير لافراخه يحن
والتفت لابنه اوينادي يا چبد...ياعلي يبني اشسبب عنّي تصد
لا شبيك وافه ولا ابو مثلك ولد...ولا ابو مثلي عرض للموت ابن
لابن اخوه التفت ناده ياگلب...زاد همّي اعليك واشتد الكرب
باضوه اعيوني الّذي يجدي الدرب...من غبت عگبك تره عيوني عمن
والتفت لابنه علي ابعبره اونشيج...اویجر حسراته اوزفراته تهيج
ياضوه اعيوني الّذي يجدي الطريج...ریت نور افلاكه عگبه اظلمن
اولبن اخوه التفت حب منه الجبين...اویشم بالوجنات ويقبّل العين
گوم شوف الخيل دارت على احسين...عن يمينه وعن يساره يغاورن
والتفت لابنه يحب منه الخدود...اويلثم ابوجناه وابشافه ب رود
بالبچه والنوح لمصابه يجود...ما يعن ساعه ابونينه اولا سكن
اولابن اخوه التفت واعليه التهف...اومن مهجته الدمع دم عالخد هدف
وجهك المبدر شچا هل اوكسف...اوسرج وجناك ابظلام اتبدّلن
والتفت اوعليه گلبه انشعب...اوصفگ بيساره يمينه وانتحب
ياعلي ناده اتفارجني اشسبب...ياعلي خلّيتني ابهم اومحن
اولابن اخوه التفت لاجنّه ابعويل...اويحن آه اعليه حن ام الفصيل
بغرف ابدم جاسم اودمعه يسيل...غده ایخضّب اچفوفه ابدمّه اويحن
گام مثل الگوس من عنده الظهَر...اومن أهل بيته فگد سبعه اوعشر
بين چوچب شمس ضحويه او گمر...انوارها اللّي تشع ياويلي خفن
مدّد الجاسم اوأنوه اعله الخيم...يمسح ابدمعه العله اخدودهه سجم
ایخاف لن ایفگدن اعليه الحرم...يگلنله اعليمن ادموعك همن
حين مجبل شافته اسكينه الحسين...اتلگته لاچن تسح دمعة العين
نادته جاسم يبويه غاب وين...من سمع سكنه الوانه اتغيّرن
خنگته العبره اوجادبها ابدمع...طاح ابن عمّج يسكنه منصرع
لفت للجاسم لگت نوره اليشع...خامد اوجسمه غده اسبيح الطعن
