وگع چبد احسينّه او گلبه انصدع...حين الأكبر من ظهر غوجه وگع

آه ويّه الاه ليه نفسي فله...تزهگ اوتلحگ اضعون اهل البله
تظل لي يمته الجوامع كربله...اسنين اوأشهر بيها مرتاضه اوجمع

ما تمل امن الونين اوما تجل...عيب يبدي العجب من عدها او تمل
حايطه بيها مصايبها مثل...ليله اعله وليده يوم انصرع

اشلون لـمّن شافته فوگ التراب...ظل چبد عدها اويو بالدمع ذاب
نادته نايم يمصباح الشباب...البالدياجي المظلمه يزهو اوسطع

ياضوه اعيوني السگط من العيون...اشلون اجي للدرب من بعدك اشلون
چیف ياواسع العز خطة الكون...تظم جثمانك اولنوارك تسع

ياعلي يارويحتي بعدك الروح...تظل حيّه لا ولاچنهه تروح
يبني طعنات البجسمك والجروح...حازهن گلبي منّك والهن جمع

گلبي يالاكبر اويافاعي اويصل...ما دعالي سهم فگدانك عگل
فرع من دوحة الهادي الها أصل...اوما ابظمن الأصل يوجد بالفرع

ياعلي يبني بشمس الحسن...درّة الاسلام يالما تنثمن
يطيب الي عيش اويغمضلي جفن...لا ولاچن ماسكن وني اوهجع

ياعلي ابوجناك ضيهن ينجلي...ليل هم احشاي يبني ياعلي
منهو من عگبك يباري محملي...الوحده الحادي اوللبيده گطع

ياعلي يبني يمن مالك مثيل...غير جدك والوصي حامي الدخيل
ما اشوف الصبر من بعدك جميل...لاچن الواجب ابفرگاك الجزع

آه من شافت الاكبر عمّته...زینب اعليه هوت ويلي اوشبگته
گلّبت جسمه اولگت من جثته...دمّه ایفوّر اومن گلبه نبع

نادته امن احواسها ابخمسة لسن...دمع وبحسرات وبوَن وبحزن
آه والخامس دمعها اعله الوجن...حتّه هرش افّادها اعليه انگطع

يسلوان احسينها اوريحانته...للمنایه عرّضل يا سلوته
ادرك ابفگدان شخصك رادته...ويِخلف غيرك تعوّض وانتفع

لا ولاچن ما يمكنون الصدف...عند أبوك احسين يشبهلك خلف
شرع دین البيه دين الله انعرف...جادك اعله الدين وحييت الشرع

يبن أخوي اللّي على دين الاله...يهدي نفسه اويجري مادونه دماه
ما شبيهه بالبريّه اولا سواه...اوكبر گدره اوللعرش شانه ارتفع

وانته ياشبه الرسول المصطفه...جدت دون الدين وحسين الوفه
گال ابوك احسين عالدنيه العفه...بعدگ او گلبه اعله فرگاك انفجع

لچن يالاكبر ابگلب احسين الك...حسره ظلّت وهي چي ما عَرّسك
ما تهنّيت اوعمامك زفّتك...للعرس وهواك مغبون انگطع

حيف يالوجناك أبهه امن الشمس...فاتك ابدنياك عرسك الونس
لا ولاچن صار الك بالطف عرس...مثله ماعين تره اوسامع سمع

يامهجته احسينّه اويمدّلـله...اشلون صارتلك وليمه ابكربله
شبعت الطير اوغدت وحش الفله...للحشر ضرس الدهر بيها رتع

من يالاكبر مثلك امن اهل الشرف...عرّس اوزفّافته سبعين الف
والنثار اعليه نشّاب ایعصف...والردينِيّه الميّاده الشمع