قابل الدنيه اوربع مسكونها...احسين بالسبعين صب طاعونها

من حضه بانصار ابو زین العباد...سیّد اوبالشرف المخلوگ ساد
من مثلهم بالنفس والمال جاد...دون ابو السجّاد نور اعيونها

لون هالسبعين ويّه المصطفه...ما هجر مكّه ولا عنها جفه
على وجه الارض صاحب وفه...مثل هالسبعين من كل كونها

لون هالسبعين ويّه المرتضه...مارقه المنبر الخاين مبغضه
جونهم باهه الصبح وجهه ابيضه...ارياح منّه طيبها ایشمّونها

لون هالسبعين للبضعه انصار...ما فدكها الغصب ماطبّوا الدار
كسّروا لحسينها اجفون الشفار...اوسوّوا ارگاب النذال اجفونها

لون هالسبعين ياجدها الحسن...ما لابن سفيان سلّمها اظعن
برز بيها احسين لجنود الوثن...اوبالمواضي ايريدهم يفنونها

منهم الواحد ابعزمه اوهمّته...يقل يذبلها اوينسفه ابراحته
دون ابو اليمّه بود امنيّته...الف مرّه اتعود اله اومغبونها

یوم تاسع ليلة العاشر احسين...صاح لاچنّه أذرفت منّه العين
يهل بيتي اویااصحابي الطيّبين...لفوا ليه والصيحته ايحيّونها

بيه حفّت لاچن الكل ايهدر...مثل ما اتحفّ الچواچب بالبدر
خطب والمعنه انعكس بينه الامر...اوغدت منّه السلطنه الترجونها

وانتوا يصحابي اويهل بيتي الكل...ما عليكم حرج من بيعتي ابحل
دونكم هاللّيل بي رحلوا عجل...وابظلامه اشخاصكم تخفونها

حيث هاي الگوم ما الها گصد...غير چتلي اوعن طلب غيري تصد
گام ابو فاضل اویزبر يرتعد...واهل بيته ادموعهم يجرونها

صاح ياعزنه اوضمدنه ياحسين...نعتذر منّك اوعنّك نِوَل وين
هاي اهل بيتك طبگ متدّرعين...بالصبر وأرواحهم يفدونها

اوگام مسلم لاچن ادموعه تسيل...صاح يبن المصطفه اوحامي الدخيل
عنّك انخلّي اونمد منّك ابليل...لا وابوك الناس شیگولونها

شيّدي اومن جدّك ابيوم الحشر...يبن حامي الجار منّه اشنعتذر
تظل بين اعداك معدوم النصر...مفرد او چفّك صفر من عونها

اونعز يبن المصطفه اعليك الارواح...لا وحگ مجدك اوللجنّه الرواح
هاي حور العين حي اعله الفلاح...نسمع اتنادي ومعلگه افنونها

وهي موته واحده حیف اووسف...اشجان ضر دونك لون اتصير الف
اومن بعدها الخلد يالما ينوصف...حِسِن وجناها اويشع مزيونها

اوبعد من عدهم الكل گام ایگول...ما نفارج وجهك اوعنّه نزول
جنها ذاك اللّيل وبنات الرسول...بيها غالب حافذه يحمونها

آه ياويلاه من حادي عشر...امست اشلون اومساها ابياقهر
مالهن والي اوحمه غير الخطر...اوغدو كل ساعه العده ايروعونها

اشلون زينب حالها لـمّن مسَت...لليمين اولليسار اتلفّتت
للغري صدّت لبو الحمله نخت...گوم وام الفخر لوح امتونها

يبو الشيمه امخدّراتك تنهظم...وانته موت الزلم لو صار الصدم
تدك اعله ابنات وحي الزلم...وانته والدها اويفارس كونها

يبو الشيمه امخدّراتك تنضرب...اويروعوها اويشتموها اوتنسلب
وانته یوم الضنك اسمك ينندب...چيف وابناتك عده ايهظمونها