[ موشح لأنصار الحسين (ع) والعقيدة ]
كسّرت هاشم غمد نحّارها...عالمنايه اتّحدت اویه انصارها
گالت الانصار يا هاشم محال...تسبگونا للطراد اوللنزال
حتّه نگضي طبگ نغدي عالرمال...دون مبنه اعيالكم واستارها
وانتو سادتنه اونواظرنه التصب...اوبين حن اضلوعنا اسويد الگلب
احنه حيّين اوتطبّون الحرب...أبد لا وخدُودكم وانوارها
ومن تسبگونا يهاشم عالطعان...ما عليكم باس يليوث الاكوان
لاچن ایگولون اهل هذا الزمان...اسلموا ساداتهم لأكدارها
اوما يشبّان الهواشم يالربع...اركنينه الكم لجل دينه اوطمع
لاچن انفسنه هتف بيها الشرع...للجهاد ابمالها واعمارها
اوما ترخّصنه الحميّه والحمه...هاشم انشوفه امعفّر بالدمه
اوهاشميّه امصلّبه واموسّمه...بالضرب وامجرّده امن ایزارها
نادت اشبول الفواطم يالاحباب...جودكم لحسينه ايباري السحاب
اومالفيتونه يزاچين الانساب...الطرب هالدنيه اولحن مزمارها
لچن ما عفتو العشاير يطيبين...طلّگيتوا الاهل وايتمتوا البنين
الاّ لجل الدين والنصرة احسين...والبنات المصطفه اولأنصارها
دونكم يكرام بالرايه الترف...طرّزوها ابحمر حرّان الزحف
شدّت السبعين عالسبعين الف...شدّت الفاعي اعله عگرب غارها
منهم الواحد يشوفونه العده...جمع بيديها المواضي امجرّده
ادرع ابگلبه اولبس ثوب الرده...اوسامها الزان الكفر واشفارها
باسمه للطعن تضحك للطبر...لاچن اعله احسين مدمعها يدر
يحسبون البيض وارماح السمر...غيد ويهب طيبها امن اظفارها
من فرد حمله اعله جمهور اليهود...وگع خمسين اسد مابين البنود
يزهي دم هاماتها فوگ الخدود...مثل ما تزهي الأرض بأزهارها
اومابگه امن أنصار أبو اليمّه جمع...غير عشرين اووتر وآخر شفع
غدت تتنازل الطعنات النبع...واحدٍ واحد الحرب اشرارها
حتّه الكل غدو مابين الطنب...اودون ورد الماي من دمعه شرب
ادّوا المفروض وعليهم وجب...واوفوا الذمّه الوليها الجارها
آه ياويلي اعله بن داي الباب...اصفرت يمناه من كل الاصحاب
حين شاف اجسادها فوگ التراب...فاضت اعيونه اعله وجهه اعبارها
وگف ما بيناتها وگفت غبن...صاح وادموعه تصب شبه المزن
لي جفيتوني يفرسان الطعن...والحرب يكرام شلتوا اوزارها
يمن فگداني عليكم مايهون...اوداعة الله الما بالوداعه يخون
يسير نرجاكم النوب اتعوّدون...للدِنيه الخاينه ابأحرارها
وتر أيّامي الّذي اوياكم مظن...من تردُون المرابيع الوطن
هاي منوه اوعابد المنوه الغبن...واللّحود اتفك محال ایسارها
چنتم اثريّه ابسماي مزهره...صابها البين اوهوت فوگ الثره
للشهاده اختاركم باري الوره...اوجادها الكم یگوم اختارها
اومال جمهور العده اسلمني غير...یوم فرگاكم الظالم والشرير
من بعدكم صرت معدوم النصير...بين من اصبح فخرها ابعارها
