بدرب الحزن ياروحي رديتي...دافن ام بيتي وراجع البيتي
راجع بليل او جدمي ضّيع ممشاه...خطوت الفاگد تنعرف من ملگاه
الفوگ الجتاف اتراب راجع وياه...معناها دافن غالي يصعب فرگاه
والدفن بيده شمعه عيونه...يتمنه كون اوياه يدفنونه
بجسمي يروحي اشعجب ظليتي...دافن ام بيتي وراجع البيتي
خاف انسأل عنج وما عندي أجواب...مابين گبرج والعمر دفعت باب
انا ابو تراب او ياخذج مني تراب...بضلعج اصواب وگلبي بيه الف صواب
ضل الحزن والنوح يبرالي...او دمعة الغالي ما ترد غالي
واتطشرت بالگاع حنيتي...دافن ام بيتي وراجع البيتي
يا شوف عيني اوضيعت شوف العين...يم المحنه أهل المحنه امتانين
وياي ردي الخاطر دموع حسين...و زينب اتاني والعمر خمس سنين
وتدعي يرب يا باقي يافاني...العن الاول والعن الثاني
تسألني واصرخ ها يعافيتي...دافن ام بيتي وراجع البيتي
شح بيه بحر الصبر وهمومي اكبار...اوجرحج اشوف منين ما وجهي اندار
وكرهت طاري الخشب من باب الدار...او يوجعني ضلعي اشما اشوفن بسمار
يا كسر بيهن ينجبر حاير...كسر الضلع لو كسرت الخاطر
يا ناري حگج لون شّبيتي...دافن ام بيتي وراجع البيتي
ضاگت الدنيه بعيني لمن رديت...ام الحسن راحت او حاير ضليت
وبوجهي صاح البيت لمن طبيت...راحت الجانت عايشه بهذا البيت
والحسن صاح ودمعة تهضمه...شله بحياته الما يشوف امه
واندب يدنيه اشبعد خليتي...دافن ام بيتي وراجع البيتي
بيت الاحزان ابداخلي صار اليوم...وعيوني ضلت للبچي مو للنوم
تدرين يالكل ابن منج معصوم ؟...بعدج علي ينخه علي من يگوم
حزني قصيده العرش يسمعها...ويلي عله الزهراء مطلعها
يقراها جبرائيل مرثيتي...دافن ام بيتي وراجع البيتي
يا كوثر أيامي الخذج مني الموت...بعدج الدنيه بعيني صارت تابوت
گمت احترگ مثل الشمع مابي صوت...كل لحضه من دونج جرح من تفوت
يا موت ردتك تسمع اعتابي...اخذ العمر بس رجع احبابي
هذي البدايه وهذي تاليتي...دافن ام بيتي وراجع البيتي
